AC Milan e ka mbyllur vitin në mënyrën më të mirë të mundshme, duke mposhtur bindshëm Hellas Verona me rezultatin 3-0 në San Siro, në ndeshjen e javës së 17-të të Serie A, të zhvilluar të dielën në mesditë.
Skuadra e drejtuar nga Massimiliano Allegri hasi vështirësi në pjesën e parë, por gjeti avantazhin pak para pushimit falë Christian Pulisic. Amerikani përfitoi nga një top i devijuar pas goditjes me kokë të Rabiot dhe realizoi golin e tij të tetë sezonal në kampionat.
Në pjesën e dytë, në skenë doli Christopher Nkunku, i cili ishte protagonisti absolut i ndeshjes. Sulmuesi francez fitoi fillimisht një penallti pas ndërhyrjes së Nelsson dhe e shndërroi vetë në gol, duke mposhtur portierin Montipò.
Pak minuta më vonë, Nkunku ishte më i shpejti në zonë për të shtyrë topin në rrjetë, pasi Modrić goditi shtyllën, duke kompletuar dopietën personale dhe vulosur rezultatin përfundimtar 3-0.
Me këtë fitore, Milani regjistron ndeshjen e 15-të radhazi pa humbje dhe ngjitet në kuotën e 35 pikëve, duke marrë përkohësisht kreun e renditjes, në pritje të përballjes mes Interit dhe Atalantës në Bergamo.
Nga ana tjetër, Hellas Verona e Paolo Zanettit (i pezulluar dhe i pranishëm në tribunë) ndalet pas dy fitoreve radhazi dhe mbetet në zonën e rrezikut, në vendin e parafundit me vetëm 12 pikë.
