Skuadra e Milanit ka shënuar fitore të madhe ndaj Napolit me rezultat 2:1, edhe pse për rreth gjysmë ore luajti me një lojtar më pak në fushë.
Ky triumf e ngjit ekipin kuqezi në krye të tabelës së Serie A, ku tashmë ndan pikët me Napolin dhe Romën – të gjitha me nga 12 pikë.
Milan e nisi ndeshjen në mënyrën më të mirë të mundshme, duke kaluar në epërsi pas vetëm tre minutash me golin e Alexis Saelemaekers, pas një aksioni të ndërtuar nga Christian Pulisic.
Amerikani vazhdoi formën e tij të lartë edhe më pas, duke realizuar golin e dytë për Milanin në minutën e 33-të, me ndihmën e një devijimi nga mbrojtësi Juan Jesus. Me këtë gol, Pulisic arrin në katër realizime këtë sezon dhe kryeson listën e golashënuesve në Serie A.
Në pjesën e dytë, Milani u gjend në vështirësi. Portieri Mike Maignan priti fillimisht një goditje me kokë, por topi i kthyer solli faullin e Pervis Estupinan ndaj Giovanni Di Lorenzos. Ai u ndëshkua me karton të kuq, ndërsa Kevin De Bruyne shënoi nga penalltia për Napolin.
Megjithatë, kuqezinjtë treguan karakter të fortë në mbrojtje. Adrien Rabiot bllokoi një goditje të rrezikshme të Eljif Elmas, ndërsa një tjetër tentativë e David Neres u ndal në traversë pas një devijimi nga Luka Modriç.
Në fund, Milani e mbajti epërsinë dhe siguroi fitoren e katërt rresht në kampionat.
Me këtë sukses, skuadra e trajnerit Massimiliano Allegrit i dha fund edhe serisë prej 16 ndeshjesh pa humbje të Napolit në kampionat, që ishte rekordi më i gjatë aktual në ligat kryesore evropiane. /Rtklive.com/
