Milan po lëviz në shumë fronte këtë merkato janari dhe emri surprizë që ka ardhur sot është ai i mesfushorit holandez Frankie De Jong, që luan me Barcelonën. Një përforcim i rëndësishëm për të ardhmen.
Sipas “El Nacional”, klubi kuqezi i ka paraqitur drejtorit sportiv të klubi “blaugrana” Deco një propozim prej 25 milionë eurosh, të cilit do t’i shtohen edhe 10 milionë euro bonuse të lidhura me paraqitjet dhe objektivat e ekipit.
Për momentin, oferta është refuzuar nga katalanasit, të cilët do të donin të paktën 45 milionë euro për të lënë të lirë De Jong. 27-vjeçari është në sezonin e tij të gjashtë me Barcelonën, por i rikthyer vonë nga dëmtimi ka luajtur shumë pak.
Lojtari ka një kontratë deri në vitin 2026 me katalanasit dhe këtë verë do të hyjë në vitin e fundit të saj. Ndaj dhe Milan po mundohet ta mbyllë që në janar këtë marrëveshje, ndërkohë që te Barcelona përpiqen të përfitojnë sa më shumë për të përballuar problemet financiare.
