Ehat Miftaraj nga Instituti i Kosovës për Drejtësi ka akuzuar ministren e Punëve të Jashtme dhe Diasporës, Donika Gërvalla, se me fonde të dikasterit që e drejton po dërgon SMS në numrat e telefonit të qytetarëve për t’u regjistruar për të votuar në zgjedhjet e 9 shkurtit.
Në një postim në Facebook, ai ka thënë se çështja e mbetjes ende në pushtet të akterëve aktualë të vendit është “jetë a vdekje”.
“Kur vjen puna te vota sa e kujdesshme është Donika Gërvalla. Përmes buxhetit të shtetit të dërgon mesazh në emër të MPJD-së dhe kërkon me u siguru që është familjarëve me iu tregu se duhet mu regjistru me votu”.
“E kanë jetë a vdekje me mbet në pushtet. Rregullone more rrymën, merrnu me punë për çka paguheni, se KQZ është ajo që me ligj e ka detyrim edukimin e votuesëve, e jo ju. E sosën buxhetin duke e shpenzu për përfitime partiake”, ka thënë Miftaraj.
