Michelle Obama ka shpjeguar pse është e lumtur që ajo dhe bashkëshorti i saj, Barack Obama, nuk kanë pasur një djalë.
Jeta private e familjes Obama ka qenë disi e mbrojtur dhe private nga publiku për shumë vite, por kjo ka ndryshuar që prej largimit të tyre nga Shtëpia e Bardhë në vitin 2017. Sidomos për Michelle, e cila ka qenë shumë aktive në media kohët e fundit, duke marrë pjesë në disa podcaste ku ka folur për jetën familjare, për përvojën në Shtëpinë e Bardhë dhe për martesën me një ish-president amerikan.
Dy vajzat e çiftit, Malia (26 vjeç) dhe Sasha (24 vjeç), ndërkohë kanë ndërtuar karrierat e tyre që prej largimit nga Uashingtoni rreth tetë vite më parë. Së fundmi, Michelle ka treguar se ndihet krenare për mënyrën se si është formuar familja e saj, duke theksuar se një djalë do të kishte qenë shumë i ngjashëm me babain e tij, Barack.
Gjatë një episodi të podcast-it që ajo drejton bashkë me vëllain e saj, Craig Robinson, “The IMO Podcast”, Michelle iu përgjigj një komenti të moderatores së njohur të radios Hot 97, Angie Martinez, e cila tha se “do të kishte qenë bukur të kishin edhe një djalë në familje”.
Michelle, e cila është 61 vjeç, reagoi menjëherë:
Jam shumë e lumtur që nuk kam një djalë, sepse ai do të ishte një Barack Obama tjetër.
“Një Barack i vogël! Do të kishte qenë fantastik,” ia ktheu Martinez. Në bisedë ndërhyri edhe vëllai i saj, Robinson, duke thënë me humor: “Ajo thjesht i ka huazuar djemtë e mi,” duke iu referuar djemve të tij, Austin dhe Aaron. Ndërkohë që prej disa muajsh kanë qarkulluar thashetheme për një krizë martesore mes Michelle dhe Barack, ajo i ka mohuar kategorikisht këto lajme.
