Prishtinë, 2 Prill – Kryetari i Partisë Demokratike të Kosovës, Memli Krasniqi, ka përkujtuar sot dyvjetorin e Marshit për Drejtësi, ku rreth njëqind mijë qytetarë u mblodhën në Prishtinë për të kërkuar drejtësi për ish-krerët e Ushtrisë Çlirimtare të Kosovës, të cilët po përballen me një proces gjyqësor në Hagë.
Në një postim të shoqëruar me pamje nga ajo ditë historike, Krasniqi theksoi se ky marshim ishte një dëshmi e bashkimit popullor për të mbrojtur të vërtetën historike dhe për të kundërshtuar padrejtësinë ndaj Hashim Thaçit, Kadri Veselit, Jakup Krasniqit, Rexhep Selimit dhe shokëve të tyre.
“Ishte një ditë e mbushur me krenari, dhembje dhe vendosmëri – sepse kur padrejtësia bëhet ligj, qëndresa bëhet detyrë,” shkroi ai, duke nënvizuar se sot, më shumë se kurrë, qytetarët e Kosovës presin kthimin e tyre të lirë.
Kryetari i PDK-së shprehu besimin e tij të plotë në pafajësinë e tyre dhe theksoi se drejtësia vonon, por nuk mungon.
“Pas një sage të gjatë, besojmë se ata do të kthehen ashtu siç shkuan – të lirë dhe të pafajshëm!”
Lideri i PDK-së ritheksoi se historia nuk mund të rishkruhet dhe se lufta e Ushtrisë Çlirimtare të Kosovës ishte dhe mbetet e drejtë.
Link: https://www.facebook.com/share/v/143BKdUjhs/?
