Pavarësisht pritjes së jashtëzakonshme nga publiku dhe suksesit të madh mediatik, Meghan Markle nuk e shijoi aspak turneun mbretëror 16-ditor në Australi dhe vendet përreth në vitin 2018, ka pohuar biografja mbretërore Tina Brown.
Në librin e saj The Palace Papers, Brown shkruan se Dukesha e Sussex “e urrente çdo sekondë” të angazhimeve, të cilat i quajti “të pakuptimta”, dhe nuk e kuptonte rolin përfaqësues të monarkisë britanike në këto vizita.
Turneu përfshinte 76 angazhime zyrtare në Australi, Zelandën e Re, Fixhi dhe Tonga – gjatë një kohe kur Meghan ishte katërmuajsh shtatzënë, shkruan DailyMail.
Pavarësisht se ishte në kulmin e “Megmania-s” dhe pritej entuziastisht nga turmat, Meghan dyshohet se u ndie e zhgënjyer nga mungesa e vlerësimit të duhur nga familja mbretërore pas kthimit në Londër.
Ajo mendohej se do të kishte një ndikim të menjëhershëm, siç ndodhi me Princeshën Diana, por sipas ekspertëve, nuk e kuptoi që Diana kishte kaluar më shumë se një dekadë duke kryer detyra rutinë para se të bëhej ikonë globale.
Një burim i brendshëm i kishte thënë Brown: “Meghan nuk e kuptoi thelbin e roleve përfaqësuese. Ajo e përçmonte kur njerëzit mblidheshin për ta parë dhe e quante budallallëk”.
Në atë kohë, media australiane dhe britanike i portretizonte Meghan dhe Harry si fytyra të reja, energjike dhe shpresëdhënëse për të ardhmen e monarkisë. Por, brenda vetëm 18 muajve nga ai turne, çifti hoqën dorë nga rolet e tyre mbretërore dhe u zhvendosën në SHBA.
Ekspertët sugjerojnë se turneu në Australi ishte një pikë kthese. “Australia i shkatërroi Harry-n dhe Meghan-in”, tha historiani mbretëror Tim Ewart për Sky News. “Ishte një nga katalizatorët për largimin e tyre nga familja mbretërore”.
Në intervistën e tyre me Oprah Winfrey në vitin 2021, Harry e përshkroi turneun si momentin kur “gjithçka ndryshoi”, duke lënë të kuptohet se suksesi i Meghan në publik mund të ketë shkaktuar tensione të brendshme në familje.
Sot, Meghan renditet ndër figurat më pak të pëlqyera të familjes mbretërore në Mbretërinë e Bashkuar. Sipas një sondazhi të fundit të YouGov, vetëm 20% e britanikëve e shohin atë pozitivisht, krahasuar me 55% në vitin 2019. Vetëm Princi Andrew ka një vlerësim më të ulët.
Pavarësisht popullaritetit të tyre fillestar, udhëtimi historik në Australi duket se shënoi fillimin e fundit për Meghan dhe Harry si anëtarë aktivë të familjes mbretërore.
