Kryetari i Komitetit të Inteligjencës së Dhomës së Përfaqësuesve, Mike Turner ka ngritur shqetësimin për kërcënim serioz të sigurisë kombëtare, në vend.
Ligjvënësi Turner i bëri thirrje administratës së Presidentit Biden të deklasifikojë informacionin
Pas mbledhjes së “Komitetit të Tetë” në Kongres, në SHBA është ngritur alarmi lidhur me një kërcënim pas të cilit dyshohet se qëndron Rusia.
Sipas rrjetit amerikan ABC News, në Kapitol është diskutuar lidhur me një informacion se rusët duan të vendosin armë bërthamore në hapësirë, për ta përdorur atë kundër satelitëve.
Këshilltari i Sigurisë Kombëtare Jake Sullivan tha se ai kishte kontaktuar personalisht për të organizuar një takim me anëtarët e lartë të komiteteve të sigurisë kombëtare, përpara se Turner të paralajmëronte publikisht për atë që e konsideron një kërcënim serioz.
Turner është njëri prej zërave që kërkon një politikë më të fuqishme kombëtare amerikane, që e ka përplasur atë me disa nga kolegët e tij republikanë që ndjekin një politikë më izoluese. Ai ka bërë thirrje për forcim të mjeteve të përgjimit të qeverisë amerikane, ndërkohë që disa republikanë dhe demokratë të vijës liberale, kanë ngritur shqetësime rreth privatësisë.
