Një iniciativë plot entuziazëm nga katër të rinj shqiptarë të diasporës, që donin të surprizonin banorin e Big Brother VIP Albania, Gjestin, ka përfunduar në një skemë mashtruese.
Sipas emisionit investigativ “Piranjat”, të rinjtë – nga Shqipëria, Kosova, Maqedonia e Veriut, por banues në shtete të ndryshme të Europës – mblodhën së bashku mbi 5,000 euro për të realizuar një surprizë ajrore me dronë dhe parashuta mbi shtëpinë e BBVA.
Por surpriza nuk ndodhi kurrë. Personi që kishte marrë përsipër organizimin e gjithë aksionit ishte Diamant Aliu, 32 vjeç nga Ferizaj i Kosovës, i cili pasi mori fondet, u zhduk pa lënë gjurmë.
Gazetarët e “Piranjave” udhëtuan drejt Ferizajt për ta takuar, por Aliu nuk u përgjigj për pjesën më të madhe të ditës.
Në një bisedë me ish-bashkëshorten e tij, ajo deklaroi se ishte ndarë prej tij dhe nuk kishte asnjë lidhje me veprimet e tij.
Më pas, ekipi i “Piranjave” tentoi të komunikojë edhe me familjarët e tij në një fshat afër Ferizajt, por pa rezultat.
Përballja e vetme ndodhi në derën e shtëpisë së tij, ku gazetari u përball me Diamantin – i cili e mbylli derën pa dhënë asnjë shpjegim se çfarë kishte ndodhur me paratë.
Rasti ka ngjallur reagime të forta në rrjete sociale, ndërsa mbetet e paqartë nëse do të ketë ndonjë pasojë ligjore për përvetësimin e shumës së mbledhur nga djemtë e diasporës në mirëbesim.
