Kylian Mbappe ka tërhequr zyrtarisht padinë ligjore ndaj Paris Saint-Germain për ngacmim moral, ka konfirmuar avokati i tij.
“Ne po tërheqim veprimin civil”, tha avokati i Mbappes, Pierre-Olivier Sur, në një deklaratë për AFP, vetëm pak ditë para se Real Madrid, klubi aktual i Mbappes, të përballet me PSG-në në gjysmëfinalen e Kupës së Botës për Klube të mërkurën.
Zyra e prokurorit të Parisit kishte nisur një hetim muajin e kaluar pas një ankese nga Mbappe, i cili pretendonte se PSG e kishte trajtuar keq në fillim të sezonit 2023/2024.
Sulmuesi pretendonte se ishte qëllimisht i lënë mënjanë dhe i detyruar të stërvitej me lojtarë që klubi synonte t’i shiste, pasi refuzoi të zgjaste kontratën e tij.
Kjo praktikë, e kritikuar nga sindikata franceze e futbollistëve si një formë izolimi profesional, çoi në një ankesë të veçantë nga sindikata në vitin 2023 në emër të lojtarëve të prekur.
Mbappe u përjashtua nga turneu parasezonal i PSG-së në Azi në vitin 2023 dhe humbi ndeshjen e parë të sezonit.
Megjithatë, ai u rikthye në skuadër më vonë pas bisedimeve me drejtuesit e klubit.
26-vjeçari u largua për te Real Madrid në verën e vitit 2024 pas shtatë sezonesh te PSG, ku shënoi 256 gola në 308 paraqitje.
Ironikisht, PSG fitoi titullin e saj të parë të Ligës së Kampionëve pak pas largimit të tij.
