Manchester City ka njoftuar transferimin më të ri në skuadër, duke sjellë sulmuesin anësor belg, Jeremy Doku, për çmimin 65 milionë euro nga Rennes.

Doku i bashkohet kampionëve të Premierligës me një kontratë pesëvjeçare nga skuadra e Ligue 1 Rennes, me të cilën shënoi 10 gola dhe kontribuoi me 12 asistime në tre sezone në të gjitha garat. Anësori është nënshkrimi i tretë i Cityt këtë verë, pas mesfushorit Mateo Kovacic nga Chelsea dhe mbrojtësit Josko Gvardiol nga RB Leipzig.

Doku është nënshkruar për të mbushur hapësirën që la Riyad Mahrez, i cili u largua nga City për t’u bashkuar me skuadrën saudite Al Ahli pas pesë viteve përplot me tituj në Etihad Stadium. Ardhja e tij mund të jetë një lajm i keq për Cole Palmer, i cili ka bërë një fillim të fortë të sezonit, por do të përballet me zvogëlimin e kohës së lojës pasi ka treguar shumë pak në garën e Cityt drejt tripletës.

“Kjo është një ditë e shkëlqyer për mua, si personalisht ashtu edhe profesionalisht. Manchester City është skuadra më e mirë në futbollin botëror, kështu që të bashkohem me ta është diçka shumë e veçantë për mua dhe familjen time,” tha Doku për faqen zyrtare të Cityt. “Unë jam një lojtar i ri me shumë mësime dhe përmirësime për të bërë. Të punoj me Pep dhe stafin e tij, dhe të luaj përkrah këtyre lojtarëve të klasit botëror, do të më bëjë një lojtar shumë më të mirë. Ndihem i sigurt për këtë. Sezoni i Cityt vitin e kaluar ishte diçka fantastike. Të fitosh tripletën është gjëja më e vështirë në futboll dhe ata ia dolën. Nuk mund ta imagjinoni se sa emocionuese është të bashkohesh me këtë ekip. Mezi pres të filloj. Shpresoj se mund t’i bëj të lumtur tifozët”.