Tuttosport raporton se Manchester United është i gatshëm të ofrojë 70 milionë euro për yllin italian Mateo Retegui, por gjithashtu janë të interesuar për Federico Dimarcon e Interit.
Yjet italianë Dimarco dhe Retegui kanë tërhequr interesin e Manchester United.
Gazeta Tuttosport raporton se trajneri i ‘Djajve të Kuq’, Ruben Amorim, është admirues i gjatë i Dimarco-s dhe tashmë ka tentuar ta sjellë atë në Old Trafford në vitin 2024.
Nga ana tjetër, Dimarco ëndërron të përfundojë karrierën te Interi, klubi i tij i preferuar, dhe drejtuesit e Nerazzurrëve po punojnë tashmë për një kontratë të re deri në 2029 ose 2030.
Dimarco ka shënuar dy gola dhe ka dhënë tre asistime në gjashtë ndeshje në Serie A këtë sezon, ndërsa kontrata e tij aktuale në Meazza skadon në qershor 2027.
Retegui iu bashkua Al Qadsiah nga Atalanta për 70 milionë euro këtë verë, pasi u bë golashënuesi më i mirë i Serie A me 25 gola.
Sipas raportit, Manchester United është i gatshëm të ofrojë të njëjtën shumë për reprezentusin italian verën e ardhshme.
Retegui ka shënuar pesë gola në katër ndeshjet e para të trajnerit të ‘Azzurrëve’, Gennaro Gattuso.
