Manchester City nuk ka arritur më shumë se një barazim 2:2 në udhëtim te Crystal Palace.
Qytetarët ishin në dy raste në disavantazh por në fund shpëtuan nga humbja.
Skuadra e Pep Guardiolës erdhi në këtë përballje pas fitores 3:0 ndaj Nottingham Forest, që ishte e para pas katër humbjeve radhazi në Premierligë.
Përballja e zhvilluar në Selhurst Park ishte shumë e balancuar, me vetëm posedimin që ishte krejtësisht në anën e kampionit në fuqi.
Munoz e kaloi në epërsi Crystal Palacen vetëm katër minuta pasi filloi takimi.
Erling Haaland barazoi shifrat në minutën e 30-të, i asistuar nga Nunes dhe me rezultatin 1:1 u mbyll pjesa e parë.
Vendasit e rikthyen epërsinë 11 minuta pasi filloi pjesa e dytë, me golin e shënuar nga Lacroix.
Rico Lewis ishte shpëtimtari i Manchester Cityt, pasi shënoi golin për rezultatin 2:2 në minutën e 68-të.
I njëjti futbollist mori karton të kuq në minutën e 84-të, ndërsa ndryshim në rezultat nuk pati dhe përballja në Londër përfundoi me barazim.
Manchester City me këtë barazim renditet në vendin e katërt, tetë pikë më pak se lideri, Liverpool, me këta të fundit që kanë një ndeshje më pak të zhvilluar.
