Kryetari i komunës së Drenasit, Ramiz Lladrovci, mori pjesë në zbulimin e Pllakës përkujtimore në shtëpinë Xhemail Xhemës që shërbeu si shtab i UÇK-së, në Fushticë të Poshtme, raporton Scanner.
“Kjo trashëgimi nuk guxon të harrohet, kjo trashëgimi është me vlerë për neve dhe gjeneratat që do të vinë, për të parë se cili ishte çmimi i lirisë, cila ishte vlera e lirisë, sa i çmuar ishte çlirimi i vendit tonë”, ka theksuar Lladrovci.
Postimi i Lladrovcit në rrjetin social:
Me familjarë të dëshmorëve, invalidë, veteranë të UÇK-së e qytetarë, përuruam pllakën përkujtimore në Fushticë të Poshtme, pranë shtëpisë shtab të UÇK-së të familjes së Xhemail Halim Xhemës
Në fjalën e rastit, theksova se kjo pllakë dëshmon një pjesë të historisë tonë të re të Fushticës dhe kësaj ane atdhetare, dëshmon se organizimi dhe rezistenca ishte aktive e familjeve dhe lagjeve tona.
Sot, kjo pllakë do të mbetet në memorien kolektive, si shtëpi, si vend dhe si pikënisje për çlirim.
Edhe më herët kam kërkuar nga Ministria e Kulturës që të krijohet sektori i veçantë për trashëgiminë tonë historike, që institucionet të merren me shënjimin, organizimin dhe identifikimin institucional të të gjitha vendeve tona me rëndësi për historinë tonë e sidomos atë të UÇK-së.
Kjo trashëgimi nuk guxon të harrohet, kjo trashëgimi është me vlerë për neve dhe gjeneratat që do të vinë, për të parë se cili ishte çmimi i lirisë, cila ishte vlera e lirisë, sa i çmuar ishte çlirimi i vendit tonë.
Në këtë ditë, na mungojnë udhëheqësit tanë që gjenden në Hagë, Hashimi, Kadriu, Jakupi, Rexhepi, Nasimi, Hysniu e shokët tjerë.
Nderim për përkushtimin atdhetar të familjes Xhema, familjeve të dëshmorëve të kësaj ane, invalidët dhe veteranët e UÇK-së. Lavdi të rënëve për çlirimin e vendit tonë! Lavdi Ushtrisë Çlirimtare të Kosovës.
