Liverpool, sipas raportimeve, e kanë bërë të qartë qëndrimin e tyre lidhur me të ardhmen e Mohamed Salah, teksa sulmuesi egjiptian vazhdon të hasë vështirësi në formë.
Ka qenë një fillim sezoni i pazakontë për standardet e Salah në edicionin 2025/2026, pasi ai ka shënuar vetëm tre gola në 12 paraqitje për kampionët në fuqi të Ligës Premier.
Në fakt, 33-vjeçari u la në stol nga trajneri Arne Slot për ndeshjen e Ligës së Kampionëve të mbrëmjes së së mërkurës kundër Eintracht Frankfurt, një përballje që Liverpool e dominoi dhe e fitoi me rezultatin 5-1.
Salah, që po kalon një periudhë të dobët, u aktivizua në minutën e 74-të në vend të golashënuesit Hugo Ekitike, por nuk arriti të gjente rrugën e rrjetës, ndërsa u kritikua për mosbashkëpunimin me Florian Wirtz në një aksion të vonshëm.
Pas përfundimit të ndeshjes, egjiptiani raportohet se ishte i irrituar, me gazetarin e Daily Mail, Lewis Steele, që shkroi në X: “Mo Salah doli direkt në tunel pas fishkëllimës së fundit. Plot gjëra pozitive për Liverpoolin sonte, por ai dukej i mërzitur”.
Para fitores ndaj Frankfurtit, Football Insider raportoi se Liverpool nuk ka ndërmend ta shesë Salah as në janar dhe as verën e ardhshme, pavarësisht fillimit të ngadaltë të sezonit.
Kjo vjen pasi Salah nënshkroi një kontratë të re dyvjeçare në prill.
Po ashtu, thuhet se vetë Salah do të ketë një rol vendimtar në përcaktimin e së ardhmes së tij.
“Sulmuesi anësor gëzon aq shumë besim te klubi, sa mund të vendosë vetë se për sa kohë do të qëndrojë te Liverpool”, thuhet në raportin e sipërcituar.
