Liverpooli ka shënuar fitore të thellë 4:1 ndaj Ipswich Town, duke konfirmuar se janë kandidatët kryesor për titullin në Premierligë. Në anën tjetër, Arsenali me shumë vështirësi ka fituar ndaj Wolves me rezultat 1:0.

Skuadra e Arne Slot e dominoi tërësisht takimin në Anfield ashtu siç pritej, duke përfunduar pjesën e parë me epërsi 3:0.

Szoboszlai shënoi për 1:0 vetëm 11 minuta pasi filloi ndeshja, i asistuar nga Konate.

Mohamed Salah e dyfishoi rezultatin në minutën e 35-të, kur asistin nga Gakpo e konvertoi në gol.

Një minutë para përfundimit të pjesës së parë, për 3:0 shënoi Cody Gakpo.

Në pjesën e dytë u shënua vetëm një gol.

Zhvillohej minuta e 66-të, kur ylli holandez e gjeti rrjetën për herë të dytë në këtë ndeshje, për rezultatin 4:0.

Krejt çfarë Ipswich bëri në këtë ndeshje ishte goli për 4:1 i shënuar në minutat shtesë nga Greaves.

Liverpool me këtë fitore tani ka 53 pikë pas 22 ndeshjeve dhe me një ndeshje më pak ka gjashtë pikë më shumë se Arsenali që është në vendin e dytë.

Në anën tjetër, Arsenali fitoi me shumë vështirësi ndaj Wolves në udhëtim.

Gjërat për skuadrën e Artetës u keqësuan kur mbeten me një lojtar më pak në minutën e 43-të, pas kartonit të kuq të Lewis-Skelly.

Në fushë po zhvillohej ndeshje e barabartë deri në momentin kur edhe Gomes i Wolves mori karton të kuq.

Arsenali e shfrytëzoi këtë dhe arritën të shënonin golin e vetëm të takimit, që në fund doli të ishte i fitores.

Riccardo Calafiori që u inkuadrua në fushë në pjesën e dytë, realizoi për 1:0 në minutën e 74-të.

Me këtë fitore, Arsenali është sërish ndjekësi më i afërt i Liverpoolit në garën për titull, ndonëse këta të fundit kanë një përballje më pak të zhvilluar.

Rezultatet nga ndeshjet tjera në Premierligë

Bournemouth 5:0 Nottingham;

Brighton 0:1 Everton;

Southampton 1:3 Newcastle United.