Leicester City ka shkarkuar trajnerin Steve Cooper, ndërsa klubi renditet i 16-ti në Premier League pas 12 ndeshjesh.
“Foxes” humbën 2-1 ndaj Chelseat, të drejtuar nga ish-trajneri i tyre Enzo Maresca, një humbje që i la vetëm dy pikë mbi zonën e rënies nga kategoria.
Cooper mori drejtimin e ekipit në verë, pasi Maresca e kishte udhëhequr Leicester-in drejt titullit të Championship-it 2023-24 dhe rikthimit në Premier League.
Në një deklaratë, klubi tha:
“Stërvitjet e ekipit të parë do të drejtohen nga trajneri i ekipit të parë Ben Dawson, i mbështetur nga trajnerët Danny Alcock dhe Andy Hughes, ndërsa klubi fillon procesin e emërimit të një trajneri të ri, që shpresojmë ta përfundojmë sa më shpejt të jetë e mundur.”
Ndihmëstrajneri Alan Tate dhe analisti Steve Rands gjithashtu janë larguar nga klubi.
Humbja ndaj Chelseat ishte disfata e gjashtë e Leicester-it këtë sezon në Premier League.
Cooper është trajneri i dytë që shkarkohet në Premier League këtë sezon, pas largimit të Erik ten Hag nga Manchester United në tetor.
44-vjeçari kishte marrë drejtimin e Leicester-it pasi ishte larguar nga Nottingham Forest në dhjetor 2023. Ai udhëhoqi Forest-in drejt promovimit në Premier League në 2022 dhe arriti ta mbante në kategori sezonin pasues, por u shkarkua në mes të sezonit 2023-24 me ekipin në vendin e 17-të.
Më parë, Cooper kishte drejtuar Swansea City për dy vite, duke i çuar në finalen e play-off-it të Championship-it në 2021, ku u mposhtën nga Brentford. Ai gjithashtu ka udhëhequr kombëtaren e Anglisë U-17 drejt triumfit në Kupën e Botës 2017.
