Lidhja Demokratike e Kosovës (LDK) ka organizuar takimin tradicional me bashkatdhetarët e mërgatës. Kryetari i LDK-së, Lumir Abdixhiku, së bashku me anëtarët e partisë, kanë pritur dhjetëra mërgimtarë që kanë mësyer vendlindjen për të kaluar pushimet e tyre në Kosovë.
Kryetari Lumir Abdixhiku, në fjalën e tij, ka përshëndetur mërgimtarët për kontributin e tyre të jashtëzakonshëm që kanë ofruar për Kosovën gjatë tre dekadave të fundit.
“Lidhja Demokratike e Kosovës ka lidhje të veçantë me diasporën, lidhje kjo që nuk është këputur asnjëherë. E nisur nga ish-presidenti historik, Ibrahim Rugova e që po vazhdon të jetë lidhje e fuqishme edhe në ditët e sotme”, tha kryetari i LDK-së, Lumir Abdixhiku para të pranishmëve.
Gjatë këtij takimi të veçantë, mërgata është informuar në detaje për sfidat dhe problemet aktuale që Kosova po ballafaqohet dhe se ‘’Rruga e Re’’ që po ndërtohet, do të bëhet bashkë ta.
