Lidhja Demokratike e Kosovës ka reaguar ashpër ndaj, siç e cilëson ajo, përpjekjeve për të ushtruar presion mbi Panelin Zgjedhor për Ankesa dhe Parashtresa (PZAP), duke e quajtur këtë një ndërhyrje të rrezikshme në procesin zgjedhor.
Në një komunikatë për medie, LDK ka theksuar se çdo tentativë për të ndikuar në vendimmarrjen e PZAP-it dhe për të manipuluar rezultatet zgjedhore përbën një cenim serioz të demokracisë dhe shtetit të së drejtës.
“LDK pret që normat demokratike dhe vullneti i qytetarëve të shprehur përmes votës së lirë të respektohen plotësisht dhe pa asnjë kusht. Çdo përpjekje për të deformuar apo anuluar këtë vullnet përmes manipulimeve politike është e papranueshme dhe e rrezikshme,” thuhet në reagim.
LDK akuzon Lëvizjen Vetëvendosje për trysni ndaj institucioneve të pavarura dhe përpjekje për të ndikuar në procesin zgjedhor. Sipas partisë opozitare, një skenar i tillë do të dëmtonte rëndë integritetin demokratik të vendit.
“Nëse vullneti i qytetarëve do të përmbyset përmes presioneve të orkestruara, LDK do të ndërmarrë të gjitha hapat e nevojshëm, duke përdorur të gjitha mjetet demokratike dhe institucionale për të mbrojtur të drejtën legjitime të votuesve tanë,” deklaron LDK.
Partia e udhëhequr nga Lumir Abdixhiku e cilëson si të rrezikshme ndërhyrjen në proceset zgjedhore dhe paralajmëron se nuk do të lejojë që zgjedhjet të shndërrohen në një farsë të dirigjuar nga pushteti.
“LDK do të vazhdojë të mbrojë pa kompromis integritetin e procesit zgjedhor, duke u angazhuar për një Kosovë ku zgjedhjet mbeten një shprehje e lirë dhe e pacenuar e vullnetit qytetar,” përfundon reagimi.
