Vedat Muriqi e kaloi në Mallorca pjesën e dytë të sezonit të fundit.
Dhe, sulmuesi kosovar bëri paraqitje bravuroze në fanellën e klubit spanjoll.
Kjo ka bërë që klubi ishullor të mundohet ta mbajë më gjatë përfaqësuesin kosovar, i cili në 16 ndeshje i realizoi 5 gola dhe i bëri 3 asistime.
Mediumi spanjoll “Mundo Deportivo” raporton se Mallorca është e interesuar për ta blerë lojtarin, por i ofron vetëm 5.5 milionë euro për kartonin e tij.
Nga ana tjetër, Lazio nuk e ka ndërmend të lëshojë pe dhe nuk zbret nën 10 milionë euro për prizrenasin.
Pra, për momentin distanca në mes të kërkesës dhe ofertës është e madhe, por mbetet të shihet nëse gjatë kësaj vere do të gjendet ndonjë marrëveshje në mes të palëve.
Muriqi nuk i ka kaluar dy vjet duke luajtur në Itali, prandaj Lazios duhet t’ia paguajë shtetit taksat.
Kjo nënkupton se “Biancocelesti” duhet ta shesin sa më shtrenjtë të jetë e mundur 28 vjeçarin.
Ndërkohë, interesim për ish-futbollistin e Rizesporit kanë shfaqur edhe gjigantët turkë, Galatasaray dhe ish-klubi i tij, Fenerbahçe.
E në Angli atë e do klubi nga Championshipi, Hull City.
Muriqi ka kontratë me Lazion deri në vitin 2025, ndërsa klubi italian e kishte blerë atë në vitin 2020 për afro 20 milionë euro.