Në fillim të viteve 1990, Abraham Karem zhvilloi dronin Predator, një fluturake vdekjeprurëse që transformoi luftën moderne dhe nisi një treg që këtë vit vlerësohet të jetë 14 miliardë dollarë.
Në 30 vitet e fundit, “Babai i Dronëve” ka punuar shumë (me financimin e Pentagonit) për aktin e dytë: teknologjinë që do të krijojë helikopterë më efikas, me rreze më të gjatë veprimi dhe mjete të tjera rrotulluese.
Përpjekja më e mirë e 86-vjeçarit për komercializim mund të ishte Overair, startup-i i tij që zhvillon taksi ajror elektrik për transportin urban. Por, gjërat nuk po shkojnë mirë në Overair.
Me përparimin në prototipin e saj të parë që ecën më ngadalë se sa ishte premtuar, kompania me bazë në Irvine, Kaliforni ka mungesë të kapitalit, sipas dy ekspertëve të larguar së fundmi, të cilët folën në mënyrë anonime me Forbes.
Ndërkohë, punonjësit – duke përfshirë shumë drejtues të nivelit C – po largoheshin masovisht nga kompania. Dy ish-punonjës thanë se shumica e stafit, i cili kishte arritur në rreth 180, ishte larguar nga kompania në muajt e fundit.
Ata thanë se ritmi i ngadaltë i kompanisë, të cilin ata ia atribuuan vendimmarrjes së ngadaltë të CEO-s, Ben Tigner dhe bordi, kishte zemëruar investitorin e vetëm të saj të jashtëm, konglomeratin industrial të Koresë së Jugut, Hanwha, i cili investoi 170 milionë dollarë në Overair.
Kompania gjithashtu ka vështirësi në tërheqjen e investitorëve të tjerë. Dy burime thanë se Overair është afruar me prodhues të tjerë të aeroplanëve elektrik, duke synuar partneritete ose shitje të mundshme.
Overair, i cili u shkëput nga kompania mëmë e Karem, Karem Aircraft në vitin 2019, po përpiqet të zhvillojë një aeroplan elektrik që ngrihet dhe ulet vertikalisht si një helikopter, por përndryshe fluturon si një aeroplan.
Overair ka promovuar teknologjinë e rotorit drifting të Karem si ajo që do t’i mundësojë atij të tejkalojë dhjetëra kompani të tjera si Joby dhe Archer, të cilat po përpiqen të ndërtojnë aeroplanë të ngjashëm, me qëllimin për të mundësuar transportin ajror me emetime të ulëta në zonat urbane dhe rajonale.
