Pas vizitës në vendpunimet e rrugës Kijevë – Zahaq, Kryeministri i Republikës së Kosovës, Albin Kurti i shoqëruar nga zëvendëskryeministrja për Çështje të Pakicave dhe Drejtat e Njeriut, Emilija Rexhepi, vazhdoi për në Komunën e Istogut, ku pa disa prej projekteve rrugore që kanë pëfunduar, në Drejë, Dobrushë dhe në Kashicë, vlera e përgjithshme e të cilave është mbi 784 mijë euro.
Me këtë rast, në këtë vizitë, kryeministri Kurti u mirëprit nga Kryetari i Komunës së Istogut, Ilir Ferati, më bashkëpunëtorë dhe bashkë takuan dhe u shoqëruan nga banorët nga komuniteti boshnjak të këtyre fshatrave me të cilët bashkëbiseduan për përditshmërinë si dhe nevojat dhe kërkesat e tyre.
Kryeministri Kurti rikonfirmoi mbështetjen e Qeverisë për komunitetet joshumicë dhe përkushtimin e saj për zhvillimin e mëtejmë të infrastrukturës në zonat rurale. Ndërkaq, zëvendëskryeministrja Rexhepi, u shpreh e lumtur që po realizohen premtimet e dhëna nga qeveria për këtë zonë.
Gjatë kësaj vizite, kryeministri Kurti ishte i shoqëruar edhe nga ministri i Mjedisit, Planifikimit Hapësinor dhe Infrastrukturës, Liburn Aliu dhe zëvendësministri, Hysen Durmishi, si dhe zëvendësministri i Industrisë, Ndërmarrësisë dhe Tregtisë, Mentor Arifaj.
