Kryeministri i Kosovës, Albin Kurti në 53-vjetorin e themelimit të Universitetit të Prishtinës tha se në shtetësinë dhe pavarësinë e Republikës sonë nuk ka institucion me rol dhe kontribut më të madh se Universiteti i Prishtinës.
“Historia e Universitetit të Prishtinës, e ndanë historinë e Kosovës në dy epoka të cilat për kufi e kanë vitin 1970: në epokën e Kosovës pa universitet dhe në epokën e Kosovës me universitet”.
Kështu tha kryeministri i Republikës së Kosovës, Albin Kurti, në shënimin e 53-vjetorit të themelimit të Universitetit të Prishtinës.
Duke folur për historinë e Universitetit të Prishtinës para të pranishmëve të shumtë, kryeministri Kurti tha se si vendi ku studiohet universalja, universiteti e ka në imanencën e tij publiken, pra, edhe politikën. Andaj, themelimi i një universiteti është gjithmonë edhe një akt politik. “Ishin demonstratat e vitit 1968 me parullën Du’m Universitet, ato që krijuan kushtet edhe politike për themelimin e Universitetit të Prishtinës”, tha kryeministri Kurti.
Më tej në fjalën e tij, kryeministri tha se nuk ka akademik, intelektual e politikan, jo vetëm nga Kosova por edhe nga Maqedonia e Veriut e Lugina e Preshevës, nga Sanxhaku e Mali i Zi që nuk ka kaluar nëpër bankat e Universitetit të Prishtinës. Madje, siç tha ai, as demonstratat qytetare e as luftën çlirimtare nuk mundemi as t’i mendojmë se lëre më t’i studiojmë a analizojmë pa Universitetin e Prishtinës.
