Kryeministri Albin Kurti kishte premtuar ulje të çmimit të energjisë elektrike gjatë zhvillimit të fushatës së vitit 2019.

Kur erdhi në pushtet doli e kundërta. Çmimi i energjisë elektrike u rrit për 15 për qind.

Nuk kaluan as katër vjet nga kjo deklaratë kur jo që nuk u lirua, por rryma u shtrenjtua.

Më 23 mars të vitit 2023 Zyra e Rregullatorit për Energji (ZRrE) e konfirmoi edhe zyrtarisht rritjen e çmimit të energjisë elektrike.

Sipas vendimit të atëhershëm të ZRrE-së, rreth 15 për qind ishte rritja e çmimit të energjisë elektrike për kosovarët, ky vendim u mor pas mbledhjes së bordit të këtij institucioni.

“Megjithatë, rritja e të hyrave do të reflektoj në ngritje të çmimeve të energjisë elektrike rreth 15% për konsumatorët fundor në vitin tarifor, të cilat do të hyjnë në fuqi prej 1 prill 2023 deri më 31 mars 2024”, u tha në njoftim.

Vetëm një vit më pas ishte ministrja e Ekonomisë, Artane Rizvanolli e cila u mundua ta arsyetonte zotimin e shefit të saj për ulje të çmimit të rrymës.

“Kryeministri Kurti kishte deklaruar kështu kur kishte ndodhur një avari në Kosovën A dhe ishte kundër propozimeve të atëhershme për shtrenjtim të rrymës, derisa sot krahasuar më kohën kur është dhënë kjo deklaratë është një botë komplet tjetër. Përveç kësaj kjo qenë në kontest të planit të LVV për rehabilitim të Kosovës A dhe nëse do të bëhej atëherë rehabilitimi i saj do të ishte shumë më i lirë sesa mund të bëhet sot por që edhe politikisht ishte një botë krejt tjetër. Rrethanat edhe politike edhe ekonomike të asaj kohe kanë qenë komplet ndryshe dhe në kohën kur ne si LVV erdhëm në pushtet ndodhi një krizë e paparë energjetike e ekonomike në vend e në botë dhe që u krijuan rrethana komplet ndryshe”, ka thënë Rizvanolli në T7.