Kryeministri i Kosovës, Albin Kurti ka marrë pjesë në Premierën e filmit “Tavolina” dhe ekspozitën për të pagjeturit nga fotografi Artan Korenica, në Muzeun Etnologjik të Kosovës.
Kurti ka falënderuar Qendrën Kinematografike të Kosovës, që ka mundësuar realizimin e këtij filmi, ku ka theksuar se shumë i afrohet përjetimit të vërtetë të nënës Ferdonije.
“Ne e dimë rastin e nënës Ferdonije,së cilës i janë rrëmbyer katër djemtë dhe burri, por është e pamundshme të mos tronditesh e trishtohesh kur e sheh në film të personifikuar nënën Ferdonije nga aktorja jonë e mirënjohur dhe e shkëlqyeshme Arta Muçaj, e cila nuk ka qenë e mundur të thotë më shumë pa folur fare.” – tha ai.
Kurti ka thënë për nënën Ferdonije, se është një grua e forcuar aq shumë nga dhembja, sa që na jep fuqi të gjithë ne të tjerëve.
“Sot më 8 Mars, në Ditën Ndërkombëtare të Gruas, me një grua si nëna Ferdonije,ne tregojmë historinë tonë, të tashmen tonë, po në të njëjtën kohë edhe fuqinë për të ardhmen, e cila e ka burimin pikërisht në gra si nëna Ferdonije.” – u shpreh ai.
