Kryeministri Albin Kurti bashkë me ministrin e Punëve të Brendshme, Xhelal Sveçla, dhe ministren e Drejtësisë, Albulena Haxhiu, sot kanë shkuar për vizitë te familja e heroit Enver Zymberi dhe familjen e heroit më të ri të policisë, Afrim Bunjakut.

Kurti me pjesëtarët e Qeverisë që e udhëheq shkuan në prag të përfundimit të vitit 2023.

Bashkë me ata ishte edhe drejtori i Policisë së Kosovës, Gazmend Hoxha.

Postimi i plotë:

Afrim Bunjaku e Enver Zymeri janë dy emra heronjsh, që si oficerë policie ranë në krye të detyrës për sundimin e ligjit, integritetin territorial dhe sovranitetin shtetëror të Republikës së Kosovës.

Bashkë me Ministren e Drejtësisë, Albulena Haxhiun, Ministrin e Punëve të Brendshme, Xhelal Sveçlën dhe Drejtorin e Policisë, Gazmend Hoxha, sot vizituam familjet e tyre në Vushtrri.

Në Samadrexhë, gruas Lumnijes, vajzës Arbenitës dhe dy djemve Fatlumit e Jetlumit, motrës Fexhrijes si dhe të afërmve të tjerë, iu shprehëm edhe njëherë mirënjohjen e thellë për sakrificën dhe kontributin e rreshterit të Policisë, heroit tonë Afrimit. Aty shkuam bashkë me djalin e Enver Zymerit, Sokolin.

Nga aty, me dy djemtë e Afrim Bunjakut, Fatlumin e Jetlumin vizituam familjen e Enver Zymerit. Na pritën vëllau Egzoni, gruaja Drita, djali Sokoli, vajzat Luljeta e Rinesa, axha Ramadani dhe shumë të tjerë.

Enverin e kujtoj dy herë. Një herë për shërbimin dhe sakrificën e tij dhe një herë tjetër për Bacën Rremë, babain e tij, Muharremin, shokun tim të burgut, me të cilin e kam ndarë të njëjtën qeli për një vit, në burg të Serbisë, e i cili ndërroi jetë para dy vitesh.

Festat e fundvitit do të ishin më të plota me Afrimin e Enverin, por ne nuk i harrojmë asnjëherë sepse ata janë historia krenare e Republikës sonë.

https://m.facebook.com/story.php?story_fbid=915055149988213&id=100044512086347&mibextid=Nif5oz