Tri ditë kanë mbetur krejt kur vendi ose duhet të ketë President të zgjedhur, ose me automatizëm shpërbëhet legjislatura dhe vendi shkon në zgjedhje të reja; dhe kjo vetëm një muaj pas konstituimit të Kuvendit të Kosovës dhe zgjedhjes së Qeverisë së Albin Kurtit III.
Familja e heroit kombëtar shqiptar, Adem Jasharit, refuzoi thirrjet dhe kërkesën e Vetëvendosjes dhe Partisë Demokratike të Kosovës që president të jetë dikush nga radhët e tyre, si Murat Jashari, Bekim Jashari apo Bashkim Jashari.
I dyti i qeverisë, Glauk Konjufca, qytetarëve të Kosovës ua kumtoi ditë më parë sikur të ishte punë-e-kryer që te Jasharët do të zgjidhej çështja e Presidentit, kur s’vonoi disa orë, Murat Jashari në person e refuzoi, dhe tregoi që në fakt e kishte refuzuar qysh më herët.
“U kam treguar atyre pse nuk e bëj”, tha Jashari në një prononcim rastësor në korridoret e fakultetit juridik të Prishtinës. As pas këtij refuzimi të hapur, Albin Kurti i Vetëvendosjes nuk hoqi dorë nga emri i tij, si “figurë ideale unifikuese”, zgjedhja e të cilit do të gjente pajtimin e të gjithëve.
Kurti tha se në mungesë të një kandidati konsensual, preferon që të ketë “kandidatura të propozuara partiakisht” që garojnë në Kuvendin e Kosovës “siç parashihet edhe me Kushtetutë.” Përndryshe, tha ai, vendi shkon në zgjedhje. Krejt në fund, para strukturave të Vetëvendosjes, ai tha se nesër takon edhe kreun e LDK-së, Lumir Abdixhikun.
Vetëvendosja e ka gjetur veten në heqje nga fjalori të vet Vjosa Osmanin. Kundër krejt rrjedhës mbështetëse të bazës së zgjedhësve të vet të cilët kanë vërshuar çdo përmbajtje online me kërkesën për zgjedhjen e Vjosa Osmanit për një term të dytë, Vetëvendosja s’ka dhënë asnjë indikacion që synojnë konsiderimin e saj.
Një nga ‘proponentët’ më kundërshtues të Osmanit brenda koalicionit të VV-së, del të jetë hiç më pak se Donika Gërvalla, figurë politike e inkuadruar në pushtet nga vetë Vjosa Osmani. Ajo, me ç’ka raportuar gazeta Nacionale përmes burimeve të mirëinformuara, ka bërë presion të madh ndaj deputetëve të GUXO-s për t’u mos u deklaruar në favor të Osmanit.
Një sekretareshë e Guxo-s, ditë më parë në “Debat Pëus” tha se si parti do të dalin me qëndrim të kryesisë, gjë e cila nuk ka ndodur ende. Ajo për më tepër, në “Debat Plus”, me ç’duket, ka tejkaluar autorizimet nga Gërvalla, kur u shpreh se si parti mbështesin Vjosa Osmanin.
Kurti para Këshillit të Përgjithshëm të VV-së
- “Një figurë e cila i bën ballë shtrëngatave me të cilat mund të përballet vendi ynë. Në kohë të vështira ne gjithmonë kem gjeti mbështetjen dhe frymëzim te familja Jashari, ashtu siç gjetëm në kohën e luftës nën udhëheqjen e Kryekomandatit Adem Jashari. Prandaj, edhe sot, zgjedhja e një figure si Murat Jashari do të ishte zgjedhja e duhur në momentin e duhur. Ky do të ishte, dhe vazhdon të mbetet rasti ideal.” (Albin Kurti në mbledhje të Këshillit të Përgjithshëm të Vetëvendosjes)
Kryeministri i Kosovës, Albin Kurti, e ka vlerësuar profesorin universitar Murat Jasharin si “figurë ideale unifikuese” për President të Kosovës.
Deklarata u bë në mbledhjen e Këshillit të Përgjithshëm të Lëvizja Vetëvendosje, në një moment kritik për afatin kushtetues.
Më 4 mars përfundon afati për zgjedhjen e Presidentit. Në të kundërtën, vendi përballet me zgjedhje të parakohshme.
“Për President duhen 80 vota,” tha Kurti para strukturave të partisë.
“Kam qenë plotësisht i vetëdijshëm se Vetëvendosje nuk i ka e vetme këto vota,” shtoi ai.
Sipas tij, kjo ka qenë arsyeja që ka nisur konsultime me opozitën.
Kurti konfirmoi takime me liderët e dy partive më të mëdha opozitare, për të diskutuar tejkalimin e situatës.
“Takimet kanë qenë konstruktive. Fillimisht ka pasur pajtueshmëri që vendi ka nevojë për figurë unifikuese,” deklaroi ai.
Ai përmendi familjen Jashari si simbol të unitetit kombëtar.
“Sigurisht nga familja emblematike Jashari. Në kohë të vështira kemi gjetur mbështetje dhe frymëzim te familja Jashari, si në luftë nën udhëheqjen e Adem Jasharit,” tha Kurti.
Sipas tij, Murat Jashari do të gëzonte mbështetje ndërpartiake.
“Bindja ime ka qenë se një figurë si Murat Jashari do të kishte përkrahje nga të gjitha partitë,” u shpreh ai.
“Zgjedhja e Murat Jasharit do të ishte zgjedhja e duhur në kohën e duhur. Kjo do të ishte rasti ideal.”
Jashari ditëve të fundit mohoi të ketë ambicie për president të Kosovës, për çka tha se liderëve politikë të vendit “ua kam treguar arsyet se pse nuke e bëj.”
Kurti tha se pas takimit të dytë me kryetarin e Partia Demokratike e Kosovës, iu komunikua një qëndrim i ri.
“Më është kumtuar nga kryesia e tyre se Presidenti nga java e ardhshme duhet të vijë nga PDK,” deklaroi ai.
Kryeministri theksoi se përkatësia partiake nuk është garanci për zgjedhjen.
“Në fund, zgjedhjen për President nuk e garanton përkatësia partiake, por vota në Kuvend,” tha Kurti.
Në mungesë të një kandidati konsensual, ai hapi mundësinë e një gare të hapur parlamentare.
“Nëse nuk arrijmë figurë unifikuese, atëherë le të ketë garë brenda Kuvendit. Këtë e sheh Kushtetuta si proces demokratik,” u shpreh ai.
Sipas tij, një garë e tillë do të ishte mënyrë për të shmangur zgjedhjet e jashtëzakonshme.
Kurti njoftoi se do të takohet edhe me kryetarin e Lidhja Demokratike e Kosovës, Lumir Abdixhikun.
“Si kryetar po angazhohem maksimalisht që ta kalojmë këtë proces,” tha ai.
Në fund, ai përsëriti qëndrimin e partisë.
“Ne si Vetëvendosje jemi të gatshëm për të gjitha opsionet,” përfundoi Kurti.
