Sipas saj, gjatë procesit janë shkelur procedurat kushtetuese dhe për këtë arsye kërkohet që Gjykata të vlerësojë ligjshmërinë e vendimit të Kuvendit.
Avokati Gent Gjini ka deklaruar për gazetën se kontestimi nga Lista Serbe për emërtimin “Kuvendi i Republikës së Kosovës” është më shumë zvarritje për të penguar formimin e qeverisë.
Sipas tij, ky veprim mund të shihet edhe si alarm për destabilizim, pasi Lista Serbe kurrë më parë nuk e ka kontestuar këtë emërtim.
Gjini thekson se pas kësaj fshihen procese gjeopolitike në Ballkan dhe përpjekje të Serbisë për të ndezur situatën në Kosovë.
“Çështja e Listës Serbe për ta kontestuar emërtimin Kuvendi i Republikës së Kosovës, sepse atyre nuk u shkon përshtati ky emërtim për shkak të dogmave nacionaliste se Kosova është pjesë e tyre dhe për ta është e pranuar vetëm Kuvendi i Prishtinës, konsideroj se kjo çështje të procedohet në Gjykatë Kushtetuese është më shumë zvarritje dhe prolongim që të formohet apo konstituohet qeveria. Por në anën tjetër kjo mund të vlerësohet edhe si alarm që mund të tregojë diçka për destabilizim tek ne, për arsye pse bash tani kjo çështje po kontestohet kur dihet se Lista Serbe asnjëherë nuk e ka kontestuar këtë në qeveritë paraprake që janë formuar.
Pra, konsideroj se janë proceset gjeopolitike në Ballkan që serbët, si në rastin e Banjskës, të bëjnë operacione të sulmit në Republikën e Kosovës, pra dëshirojnë të ndezin situatën në çdo formë dhe mënyrë”, deklaron ai.
Gjini thekson se juridikisht nuk ka arsye për shqetësim, por praktikisht situata është alarmante.
Ai paralajmëron se rastet e fundit të spiunazhit tregojnë përpjekje të Serbisë për destabilizim dhe kërkon që Kosova të aktivizojë agjencitë e sigurisë dhe të njoftojë SHBA-në për rrezikun.
“Pra, në aspektin juridik nuk ka çfarë të shqetësohet, por në anën praktike konsideroj se duhet të brengosemi, pasi që edhe spiunazhi i fundit me ushtarin e KFOR-it dhe dashnores së tij janë të gjitha shenjat që pala serbe dëshiron të destabilizojë shtetin e Kosovës në forma tashmë më invazive. Në këtë rast çfarë duhet të bëjë shteti i Kosovës, është të aktivizojë agjencitë e sigurimit si AKI-ja dhe të njoftojë palën amerikane, përkatësisht Departamentin e Shtetit Amerikan, për sigurinë që mund të cënohet nga pala serbe” – e përmbyll fjalën e tij avokati Gent Gjini.
