Kryeprokurori i Prokurorisë Themelore në Ferizaj, Burim Çerkini ka dhënë detaje lidhur me vrasje makabre të rreshterit Muhamed Lika, mbrëmë në Kaçanik, shkruan Insajderi.
Kryeprokurori ka konfirmuar se nuk ka pasur të bëjë me grabitje, por synim e kanë pasur zyrtarin policor.
Me siguri më të madhe mund të themi se nuk ka të bëjë me grabitje. Pista për momentin deri më tani nuk ekziston se të dyshuarit kanë pas për qëllim grabitje. Qëllimi i tyre ka qenë ekzekutimi i policit”, tha ai.
“Deri tani sa kemi mbërritur te hetimit personat që e kanë kryer vrasjen nuk kanë pasur qëllim të kryejnë një grabitje. Pasi kanë qenë dy persona mund të jetë vrasje e planifikuar”, tha ai para mediave.
Kryeprokurori ka thënë se po bëhet punë e jashtëzakonshme për të gjetur dhe kapur autorët e vrasjes.
“Jemi duke i ndërmarrë të gjitha veprimet hetimore për të zbuluar arsyen dhe motivin që ka çuar deri në kryerjen e kësaj vrasje shumë të rëndë. Që nga nata e mbrëmshme hetuesit policorë janë në terren për të identifikuar dhe vlerësuar çdo informatë, provë, dëshmi e që do të na drejtojë në pistat e mundshme të hetimit që do të na lehtësojë zbardhjen e kësaj çështje penale”, tha ai.
Çerkini ka thënë se janë intervistuar “shumë persona, dëshmitarë, persona që kanë rastisë në vendin e ngjarjes, që mund të japin informacione të rëndësishëm për organet e rendit e që do të na shpie në zbardhjen e kësaj çështje”.
