Kjo vjen pasi Kanadaja përballet me një luftë tregtare dhe kërcënime ndaj sovranitetit të saj nga presidenti amerikan Donald Trump.
Kryeministri i sapoemëruar i Kanadasë Mark Carney ka thirrur zgjedhje të parakohshme, duke e çuar vendin në zgjedhje më 28 prill.
Kjo vjen pasi Kanadaja përballet me një luftë tregtare dhe kërcënime ndaj sovranitetit të saj nga presidenti amerikan Donald Trump – çështje që pritet të jenë në kryesore.
Gjithashtu vjen nëntë ditë pasi Carney, një liberal, u betua si kryeministër i Kanadasë pas dorëheqjes së Justin Trudeau.
Carney tani duhet të përballet me liderin e Partisë Konservatore, Pierre Poilievre, i cili kishte udhëhequr në sondazhet kombëtare që nga mesi i vitit 2023, megjithëse sondazhet e fundit sugjerojnë se gara tani është kokë e kokë.
Carney fitoi në votimin e parë të dielën në mbrëmje, duke marrë 85.9% të votave për të mundur rivalin e tij më të afërt, ish-ministren e financave, Chrystia Freeland.
Brohoritjet e forta shpërthyen ndërsa rezultatet iu njoftuan një turme prej rreth 1600 besimtarësh të partisë në Otava, kryeqyteti i Kanadasë.
Pjesa më e madhe e fjalimit të Carney u fokusua në ato që ai i quajti “tarifat e pajustifikuara” të Trump ndaj Kanadasë, partnerit më të madh tregtar të Amerikës.
Shtetet e Bashkuara vendosën taksa prej 25% për mallrat kanadeze të martën e kaluar, por u kthyen brenda disa ditësh për të përjashtuar mallrat në përputhje me një marrëveshje tregtare ekzistuese.
Kanadaja u përgjigj me tarifat hakmarrëse të saj, ndërsa Trudeau akuzoi homologun e tij amerikan se po përpiqej të rrënonte ekonominë e vendit.
Carney i bëri jehonë kësaj në fjalimin e tij të fitores, duke thënë se Trump po “sulmonte punëtorët, familjet dhe bizneset kanadeze”.
“Ne nuk mund ta lëmë atë të ketë sukses,” shtoi ai, ndërsa turma bërtiti me zë të lartë.
Ai tha se qeveria e tij do të mbajë tarifat për importet amerikane “derisa amerikanët të na tregojnë respekt”.
Ekonomia e Kanadasë varet ndjeshëm nga tregtia me SHBA-të dhe rrezikon të bjerë në recesion nëse tarifat gjithëpërfshirëse të kërcënuara nga Trump vendosen plotësisht.
