Anëtari i Kryesisë së LDK-së, Muhamet Hamiti, ka reaguar ndaj kritikave të emisarit amerikan Gabriel Escobar për kryeministrin Albin Kurti.
Ai ka bërë me dije se Kurti nuk ka probleme vetëm me militantët e VV-së.
Në profilin e tij në “Facebook”, Hamiti ka shkruar se Kurti ka probleme me gjithë të tjerët.
“Qeveria Kurti nuk ka ende probleme komunikimi me militantët e VV-së. Me të tjerët po. Me të gjithë!”, ka shkruar Hamiti.
Emisari amerikan për Ballkanin Perëndimor, Gabriel Escobar, sot ka konfirmuar edhe një herë që Shtetet e Bashkuara të Amerikës aktualisht kanë probleme “në komunikim” me kryeministrin Albin Kurti.
Në një bisedë me gazetarë, ai është shprehur se Kosova këtë problem s’e ka veç me ShBA-në, por edhe me BE-në, NATO-n, Britaninë e Madhe, e madje, edhe me dy shtetet fqinje, Shqipërinë e Maqedoninë e Veriut.
“Partneriteti mes ShBA-së dhe Kosovës është mes popujve të Kosovës dhe ShBA-së. Nuk shkon prej një njeriu, ose një pale. Por, duhet të them, aktualisht ne kemi një problem me komunikimin me kryeministrin, nuk është veç ShBA-ja, këtë problem Kosova e ka edhe me BE-në, me NATO-n, me Britaninë e Madhe. Edhe me partnerë të tjerë, Shqipërinë e Maqedoninë e Veriut. Kemi pasur një partneritet shumë të afërt me Kosovën në të kaluarën, ne duam ta kemi këtë lidhje edhe tani siç ishte në të kaluarën.” – tha ai.
