Kryetari i Partisë Demokratike të Kosovës, Memli Krasniqi, ka reaguar pas mos-votimit të Projektligjit për tërheqjen e 30% të shumës nga Trusti Pensional.
Krasniqi ka deklaruar se është për keqardhje se si Qeveria Kurti dhe deputetët e VV-së injorimi që po iu bëhet kërkesave të qytetarëve, shkruan Demokracia.com.
“Është për keqardhje injorimi i vazhdueshëm që Qeveria Kurti dhe deputetët e Lëvizjes Vetëvendosje po u bëjnë kërkesave dhe nevojave të qytetarëve, sikur kjo e tërheqjes së një pjese të kursimeve të tyre nga Trusti. Në vend të mbështetjes e ndihmës, e tëra që po përfitojnë qytetarët nga kjo Qeveri është keqqeverisja, skandalet korruptive, papërgjegjësia, regresi ekonomik e vështirësimi i jetës së tyre”, ka deklaruar ai.
“Sa t’i kenë për miq, anëtarë të partisë e zyrtarë të lartë tipat si Martin Berishaj, është normale që këtij Kryeministri do t’i mungojë vazhdimisht sensi i empatisë ndaj krizës me të cilën po ballafaqohen qytetarët”, ka thënë ndër të tjera Krasniqi.
