Njohësi i çështjeve politike, Nezir Kraki ka thënë se përfaqësuesit e BE-së, Josep Borrell dhe Miroslav Lajçak po e përfundojnë mandatin e tyre në raport me Kosovën pa asnjë rezultat konkret.
Ai ka thënë se masat ndaj Kosovës u vendosën si rezultat i një standardi të dyfishtë që Bashkimit Evropian e ka përdorë në dialog, i cili sipas tij, nuk ka dhënë rezultat.
“Lajçak dhe Borell fatkeqësisht po e përfundojnë mandatit pa asnjë rezultat konkret. Fatkeqësisht ato masa atëherë erdhën sepse BE nuk guxonte me i bë presion Serbisë dhe hajde t’i bëjmë presion të dobëtit, Kosovës në këtë rast”, ka thënë ai në emisionin “Këndi i Debatit” në Tëvë 1.
I pyetur se pse BE-ja nuk e ka sanksionuar Serbinë, ai ka thënë se kjo është bërë sepse për momentin vlerësohet se më e rëndësishme është kthimi i Serbisë nga Evropa, se konsolidimi i Kosovës si shtet.
“Është instalua një farë bindje, ideje në kancelaritë evropiane, por edhe diplomatë amerikanë dhe evropianë në Kosovë e Beograd se, Serbia duhet mu divorcu nga Rusia dhe me gjasë për momentin interesi është që Serbia e kthyer nga Evropa është më e rëndësishme se konsolidimi i Kosovës si shtet”, tha ai.
