Prania e të gjithë futbollistëve në stërvitjen e parë ka dhënë sinjalin më të qartë për rëndësinë që ka ndeshja ndaj Slovakisë.
Kosova e ka nisur në mënyrën më serioze të mundshme përgatitjen për ndeshjen që do të zhvillohet në Bratislavë, me synimin për të siguruar një vend në finalen e plejofit për FIFA World Cup 2026.
Nëse arrin fitore, Kosova do të luajë më 31 mars në stadiumin Fadil Vokrri Stadium, ku do të përballet me fituesin e çiftit Turqi–Rumani për një vend historik.
Për herë të parë në një fazë të tillë, “Dardanët” i kanë nisur përgatitjet pa mungesa në grumbullim. Që në ditën e parë, të hënën, të gjithë lojtarët e ftuar ishin të pranishëm në stërvitje, duke reflektuar përkushtimin maksimal para këtij takimi vendimtar.
Përzgjedhësi Franco Foda ishte i pari që doli në fushë, ndërsa pas tij u panë edhe emra që pritet të kenë rol kyç në formacion si Mërgim Vojvoda dhe Dion Gallopeni. Më pas iu bashkua edhe mesfushori Elvis Rexhbeçaj, i cili gjithashtu konsiderohet startues potencial.
Gradualisht në fushë dolën edhe yjet kryesorë si Vedat Muriqi, Edon Zhegrova, Arijanet Murić, Fisnik Asllani dhe pjesa tjetër e grupit.
Atmosfera në stërvitje ishte shumë pozitive, me lojtarët që shfaqeshin të relaksuar, por njëkohësisht të fokusuar maksimalisht. Disa punonin individualisht me top, të tjerë diskutonin mes vete, derisa trajneri i mblodhi për të nisur seancën sipas planit.
Stërvitja filloi me ushtrime të lehta ngrohjeje, ndërsa ritmi i punës u rrit gradualisht. Intensiteti pritet të shtohet edhe më shumë në dy ditët në vijim, teksa afrohet ndeshja e së enjtes që nis nga ora 20:45.
Megjithatë, Kosova nuk do të jetë e plotë në këtë sfidë, pasi mungojnë disa emra të rëndësishëm si kapiteni Amir Rrahmani, si dhe Leart Paqarada, Muharrem Jashari dhe Leon Avdullahu.
Në mungesë të Rrahmanit, shiritin e kapitenit do ta mbajë Muriqi, i cili mbetet figura kryesore e sulmit dhe golashënuesi më i mirë në historinë e Kosovës, me 32 gola në 66 paraqitje.
Kosova tashmë është vetëm një hap larg një arritjeje historike dhe gjithçka nis nga përballja në Bratislavë.
