Komandant i Forcës së Sigurisë së Kosovës, Gjenerallejtënant Bashkim Jashari, e ka pritur një delegacion të lartë nga Instituti Kërkimor Shkencor Ushtarak i Akademisë së Forcave të Armatosura të Shqipërisë, në kuadër të bashkëpunimit me Komandën e Doktrinës dhe Stërvitjes së FSK-së.
Me këtë rast, Jashari vlerësoi rolin kyç të këtij institucioni në zhvillimin e kërkimeve shkencore ushtarake, duke e cilësuar thelbësor për modernizimin e forcave të armatosura.
“Ai theksoi rëndësinë e bashkëpunimit në fushën e sigurisë dhe mbrojtjes, për të ndërtuar kapacitete të avancuara dhe të përbashkëta”, thuhet në njoftimin e FSK-së.
Në përmbyllje, të dyja palët u pajtuan të vazhdojnë dhe thellojnë bashkëpunimin në fushën e kërkimeve ushtarake dhe aktiviteteve të përbashkëta profesionale.
