Komuna e Prishtinës iu ka bërë thirrje qytetarëve që të tregojnë kujdes të shtuar për sigurinë dhe mirëqenien e përgjithshme gjatë këtyre ditëve të festave.

Në një komunikatë të lëshuar nga Komuna e Prishtinës në Facebook, thuhet se në festat e fundvitit, kryeqyteti mbushet me vizitorë dhe aktivitete të shumta, prandaj është e rëndësishme të tregohet kujdes,.

“Gjatë ditëve të festave që po afrohen, kur Kryeqyteti ynë mbushet me gëzim, vizitorë dhe aktivitete të shumta, është e rëndësishme që secili prej nesh të tregojë kujdes të shtuar për sigurinë dhe mirëqenien e përgjithshme”, shkruhet mes tjerash në postim.

Postimi i plotë:

NJOFTIM PËR QYTETARËT E KRYEQYTETIT

Të nderuar qytetarë të Prishtinës,

Gjatë ditëve të festave që po afrohen, kur Kryeqyteti ynë mbushet me gëzim, vizitorë dhe aktivitete të shumta, është e rëndësishme që secili prej nesh të tregojë kujdes të shtuar për sigurinë dhe mirëqenien e përgjithshme.

Apelojmë për vigjilencë dhe bashkëpunim nga të gjithë qytetarët:

• Vëzhgoni rrethinën dhe lajmëroni menjëherë autoritetet për çdo rast të dyshimtë, situatë apo individ që mund të paraqesë rrezik për rendin dhe sigurinë.

• Kontaktet emergjente: Policia e Kosovës – 192 | Zjarrfikësit – 193 | Ndihma e Shpejtë – 194, Qendra Operative Emergjente 0800 122 33 ose 122 44.

• Mos hezitoni të raportoni mjete apo pako të braktisura në hapësira publike.

Lutemi për kujdes të shtuar në hapësirat e mbipopulluara si:

• Sheshet dhe qendrat kryesore të qytetit

• Hapësirat tregtare dhe festive

• Pikat e organizimeve kulturore dhe aktiviteteve të tjera publike.

Rregullat bazë për një festë të sigurt:

• Kujdesuni për sendet personale gjatë lëvizjes në turma.

• Respektoni udhëzimet e organeve të sigurisë dhe sinjalizimet në trafik.

• Mos bllokoni hyrjet dhe daljet e objekteve publike.

Masat që do të zbatohen gjatë festave janë si vijon:

1. Rritja e pranisë së forcave të rendit dhe sigurisë

• Patrulla shtesë do të jenë të pranishme në sheshet kryesore dhe zonat me dendësi të madhe të qytetarëve.

2. Paralajmërim mbi përshkrimin dhe përdorimin e mjeteve piroteknike

• Kujtojmë qytetarët se përdorimi i mjeteve piroteknike është i rrezikshëm dhe i ndaluar në hapësirën publike.

• Do të ketë kontrolle të shtuara nga organet përkatëse.

3. Ndihma e shpejtë dhe shërbimet emergjente

• Te gjitha ekipet Emergjente te Kryeqytetit dhe Policise se Kosoves do të jenë të gatshme 24/7 për çdo situatë të mundshme.

4. Thirrje për kujdes të shtuar

• Ftojmë qytetarët të kenë kujdes të veçantë ndaj fëmijëve dhe të moshuarve në turmat e mëdha.

Si gjithmonë, mirëqenia e Kryeqytetit tonë është përgjegjësi e përbashkët. Duke qëndruar të kujdesshëm dhe të bashkëpunueshëm, festat tona do të jenë më të sigurta dhe më të gëzueshme për të gjithë.

Ju falënderojmë për mirëkuptimin dhe bashkëpunimin tuaj!

Drejtoria për Siguri dhe Emergjenca