Nico Paz është shfaqur si një nga zbulimet më të mëdha të këtij sezoni në futbollin italian. Paraqitjet e tij me Comon nuk kanë kaluar pa u vënë re nga klubet më të mëdha evropiane, dhe megjithëse gjithçka dukej se kthimi i tij te Real Madridi ishte vetëm çështje kohe, skenari ka ndryshuar rrënjësisht ditët e fundit.
Sipas mediave italiane, talenti spanjollo-argjentinas është parë duke darkuar me Javier Zanettin, zëvendëspresidentin e Interit të Milanos, duke konfirmuar se klubi zikaltër ka nisur kontakte formale për të joshur mesfushorin sulmues.
Ky zhvillim ka shkaktuar shqetësim në “Chamartín”, ku pritej rikthimi i Nicos për sezonin e ardhshëm. Në fakt, Florentino Pérez kishte siguruar 50% të të drejtave të lojtarit pikërisht për të lehtësuar rikthimin e tij, një operacion që mund të mbyllet për vetëm 8 milionë euro. Megjithatë, ndërhyrja e Interit shton presionin në një histori që dukej se do të përfundonte me një fund të lumtur për tifozët madrilenë.
Pavarësisht kësaj, në Valdebebas vazhdojnë të besojnë se Nico do t’i japë përparësi kthimit në atë që ai e konsideron si shtëpinë e tij. Lojtari nuk e ka fshehur kurrë admirimin për Real Madridin dhe së fundmi tregoi afërsinë me klubin duke e uruar publikisht Jacobo Ramón pas golit të tij ndaj Mallorcës, një gjest që u prit shumë mirë nga tifozët e “Los Blancos”.
Drejtuesit sportivë të kampionëve të Evropës janë të vetëdijshëm për situatën dhe planifikojnë të takohen me përfaqësuesit e lojtarit në ditët në vijim për të sqaruar të ardhmen. Edhe pse nuk përjashtohet mundësia që ai të qëndrojë edhe një vit tjetër në Itali, synimi fillestar ishte që të rikthehej në vitin 2025, ose edhe këtë verë. Megjithatë, lëvizja e Interit rrezikon t’i prishë këto plane.
