Kompania e cila ka transportuar për në Kosovë trupin e pajetë të Faton Hajrizin, nuk është lejuar që ta hap arkivolin në të cilin ndodhej trupi i 39-vjeçarit nga Skenderaj.
Nga kjo kompani kanë thënë se trupi i të ndjerit nuk është mirëmbajtur në morg në Serbi, teksa ka shtuar se arkivoli është i mbyllur hermetikisht dhe i metaltë brenda.
“Nuk e kanë pas mundësinë me e hap, nuk na kanë leju me e hap në asnjë mënyrë arkivolin e Fatonit. Gjendja e arkivolit është e mbyllur hermetikisht është arkivol i metalt brenda ku nuk ka mundësi mu pa trupi e as mu prek. Nuk këna pas mundësi me e hap absolutisht. Nuk kemi mujtë me vërejt diçka, sepse arkivoli ka qenë hermetikisht i mbyllur”, ka thënë Avni Elezi nga kompania ‘Funerali’ për T7.
Ky i fundit ka thënë se trupi i Fatonit mund të jetë dëmtuar për shkak se në morg nuk është mirëmbajtur siç duhet.
“Krejt varet si mirëmbahet në morg, nëse i bahet balsamimi nuk ka probleme, por në këtë rast nuk është bërë. I bie që trupi mundet me kanë i dëmtuar mund të ketë erë, të jetë trupi i nxirë”, ka thënë Elezi.
Ndryshe, Ministria e Punëve të Jashtme dhe Diasporës është deklaruar pas kthimit të trupit të Faton Hajrizit në Kosovë.
Në njoftimin drejtuar mediave, MPJD ka thënë se institucionet përkatëse po kryejnë procedurat e mëtejshme mjeko-ligjore për identifikimin dhe verifikimin e tij.
Lidhur me rastin, ka folur edhe avokati i angazhuar nga familja Hajrizi, Arianit Koci, i cili ka thënë se i vrari në Llozicë të Serbisë më 19 korrik është Faton Hajrizi.
Avokati Koci ka thënë se ka parë trupin e Hajrizit.
Konstatimi erdhi pas strishos së pështymës së dhënë të nënës së Faton Hajrizit, e dorëzuar në fund të muajit korrik.
Hajrizi, që ishte arratisur nga Qendra Korrektuese në Smrekonicë më 6 korrik, u bë i dyshuar për vrasjen e një polici serb dhe plagosjen e një tjetri në orët e para të 18 korrikut në Lloznicë.
