Komisionerja për Zgjerim e Bashkimit Europian, Marta Kos, tha sot se normalizimi i marrëdhënieve me Serbinë është një kërkesë kyçe për rrugën evropiane të Kosovës. Po ashtu, ajo tha se ka ardhur koha që të hiqen gradualisht masat ndëshkuese ndaj Kosovës.
“Dialogu nuk ka alternativë. Normalizimi i marrëdhënieve me Serbinë është një kusht thelbësor për pranimin e Kosovës në BE”, deklaroi ajo në fillim të debatit mbi raportin e Terras.
Ajo theksoi nevojën për një vazhdim “të fortë dhe konstruktiv” të dialogut të ndërmjetësuar nga BE-ja midis Prishtinës dhe Beogradit.
Gjithashtu, Kos përshëndeti zgjedhjet e fundit parlamentare në Kosovë, duke vënë në dukje se ato u mbajtën në mënyrë paqësore dhe me pjesëmarrjen e të gjitha komuniteteve. Ajo tha se vendi është gati të reformojë institucionet e tij dhe duhet të veprojë shpejt për ta bërë këtë.
“Një marrëveshje për mekanizmin e reformës duhet të nënshkruhet dhe ratifikohet. Kuvendi duhet ta mbështesë atë dhe është një kusht për marrjen e fondeve të BE-së. Kosova duhet të përshpejtojë reformat ligjore”, deklaroi Kos, duke theksuar se këto reforma do të mundësojnë përparimin në rrugën drejt BE-së.
Ajo gjithashtu vlerësoi përafrimin e Kosovës me BE-në në raport me luftën në Ukrainë, duke e quajtur atë një demonstrim të qartë të orientimit strategjik.
Pas debatit, i cili përfshinte thirrje nga disa eurodeputetë për të hequr sanksionet ndaj Kosovës, Kos arriti në përfundimin se “duket se ka ardhur koha për të filluar heqjen graduale të sanksioneve”
.
Eurodeputetët do të votojnë të mërkurën për përgjigjen e Parlamentit ndaj raporteve të Komisionit për vitin 2023 dhe 2024 mbi Kosovën dhe Serbinë. Raportet e zgjerimit janë përgjigjja e Parlamentit Evropian ndaj raporteve vjetore të Komisionit mbi vendet kandidate dhe kandidate potenciale (Kosova) në procesin e pranimit në BE.
