Kryetari i Lidhjes Demokratike e Kosovës, Lumir Abdixhiku, i ka dalë në krah kandidatit për deputet nga kjo parti, Hysen Çekajt, pas akuzave të Vetëvendosjes qpër votat që ai ka marrë nga votimi me postë, ku numëron 12 mijë vota.
Abdixhiku ka thënë se VV’ja po e sulmon Çekajn sepse duan të dekurajojnë, njollosin e zhvlerësojnë.
“E sulmojnë sepse duan ta dekurajojnë, njollosin e zhvlerësojnë. Sepse janë me mllef, me shumë mllef, që ai së bashku me ne, theu një mit që s’mendohej se do të thyhej ndonjëherë! Si një njeri i urtë, si një djalë i jashtëzakonshëm, ai ka më së paku nevojë për mbrojtje. Tani me barrën e re të përfaqësimit, ka veç një mision. Të shenjtin para vetes. Që popullizmin rrënues, atë që po na mbanë peng në urrejtje, ta çrrënjosë me ka krejt, e herën tjetër të dyfishojë këtë mbështetje. Kokën lartë Hysen!”, ka shkruar Abdixhiku.
Ai ka falënderuar sërish mërgatën.
Në total, sipas rezultatave preliminare, Çekaj ka marrë 23 mijë e 438 vota. 11 mijë e 268 vota nga votimi i rregullt, 12 mijë nga votat me postë, 98 nga votimi nëpër përfaqësitë diplomatike dhe 7 nga numërimi i rreth 80 përqind e votave me kusht. Numërimi i votave të personave me nevoja të veçanta s’ka nisur ende.
Çekaj i është bashkuar Lidhjes Demokratike të Kosovës në shtator të vitit 2024. Ai ka qenë kandidat për deputet nga mërgata, saktësisht nga dega e LDK’së në Gjermani. Hysen Çekaj është djali i heroit Sali Çekaj.
Për numrin e votave që ka marrë Çekaj nga diaspora ka ngritur dyshime Sekretari i Vetëvendosjes, Alim Rama. Sipas tij, “votimi për Çekajn dhe të tjerët është i kurdisur dhe i manipuluar”.
“Shumë fletëvotime që përmbajnë votën për Çekajn dhe të tjerët duken si kopje identike, ngjashmëri kjo që ngre dyshime mbi autenticitetin e tyre. Ajo që bie në sy është fakti se përmes votimit në konsullatën e Shtutgardit, ku ai jeton, Çekaj ka arritur të sigurojë vetëm 33 vota. Ndërkohë, në të gjitha konsullatat e tjera në Gjermani, përfshirë ambasadën në Berlin, ai ka arritur t’i marrë 22 vota. Në ambasadat dhe përfaqësitë diplomatike në shtetet e tjera, votat për Çekajn shkojnë deri në 5”, ka shkruar Rama.
