Al Hilal ka nisur një ofensivë të drejtpërdrejtë për të siguruar shërbimet e Simone Inzaghit si trajnerin e tyre të ri, duke ofruar një propozim ekonomik që vështirë se mund të refuzohet: 20 milionë euro në vit për një kontratë dyvjeçare.
Klubi saudit dëshiron të finalizojë sa më shpejt mbërritjen e teknikut italian, për shkak të largimit të mundshëm të Jorge Jesus, i cili është në pikëpyetje si për arsye sportive, ashtu edhe jashtë fushës.
Qëllimi i Al Hilal është i qartë: të rindërtojë projektin sportiv përpara Kupës së Botës për Klube.
Performanca e skuadrës gjatë sezonit ka ngjallur dyshime në bordin drejtues, dhe situata e trajnerit aktual – së fundmi i lidhur me përfaqësuesen e Brazilit – ka përshpejtuar planet për të gjetur një zëvendësues të nivelit të lartë.
Fahad bin Nafil, presidenti i klubit, është takuar personalisht me Inzaghin për t’i paraqitur projektin ambicioz.
Inzaghi, i përqendruar aktualisht te objektivat me Interin, ka zgjedhur të qëndrojë i qetë dhe të shtyjë çdo vendim deri në përfundim të sezonit në Itali.
Megjithatë, përmasat e ofertës dhe gatishmëria e Al Hilal për të paguar klauzolën e lirimit tregojnë se operacioni është mëse serioz.
Basti për Inzaghin nuk është i izoluar. Klubi arab synon një ristrukturim të thellë, jo vetëm në stol por edhe brenda skuadrës. Megjithëse mbeten në garë për titullin vendas, ndjesia është se kampionët aktualë kanë nevojë për një drejtim të ri dhe një lëvizje të bujshme për të riafirmuar veten si fuqi dominuese në Azi dhe në skenën ndërkombëtare. Mbërritja e Inzaghit do të shënonte hapin e parë të një epoke të re në Riad.
