Deri më tani, firma kaliforniane Unplugged Performance i ka përqendruar përpjekjet e saj në ofrimin e kënaqësisë së ngasjes nga çdo model i Tesla, madje ndërtoi një veturë garash Model S Plaid e cila drejtohej nga Randy Pobst në çdo garë të Pikes Peak që nga viti 2021.
Unplugged dëshiron që kjo të jetë një pjesë kryesore e biznesit të saj edhe në të ardhmen, madje kjo është një dëshirë aq e madhe, sa që kompania ka nisur një divizion krejt të ri të flotës i njohur si UPfit, shkruan TopGear, transmeton Telegrafi.
Tani, UPfit bën disa pretendime mjaft të mëdha në lidhje me përfitimet e Tesla-s së saj ndaj veturave të zakonshme të policisë të markës Ford. Divizioni UPfit llogarit se Modeli Y kushton 91,990 dollarë, kjo pasi të jetë blerë dhe konvertuar në specifikimet e veturave policore, ndërsa një Ford Police Interceptor Utility Hybrid ka një çmim prej 98 mijë dollarëve.
Si rezultat, UPfit llogarit një kursim të mundshëm të kostos pesëvjeçare prej 27,012 dollarësh kur përdor Modelin Y në krahasim me një Ford me fuqi hibride.
“Zgjedhja e Tesla-s si platforma për automjetet tona patrulluese është një dëshmi e përsosmërisë së pashembullt inxhinierike dhe performancës së dëshmuar që ato ofrojnë”, thotë James Hedland, drejtor i flotës në Unplugged Performance.
“Duke shfrytëzuar teknologjinë e Tesla-s, ne jemi krenarë t’i ofrojmë zgjidhjet më të fundit forcave të zbatimit të ligjit, e të cilat janë edhe zgjidhje të besueshme dhe të qëndrueshme, duke fuqizuar oficerët për t’i shërbyer komuniteteve të tyre me besim”, shtoi tutje ai.
