Presidenti amerikan Donald Trump njoftoi se ka rënë dakord për një armëpushim dyjavor me Iranin, më pak se dy orë përpara skadimit të afatit të tij për ta shkatërruar “një civilizim të tërë” në Iran.
Trump tha se marrëveshja për armëpushim u bë me kusht që Irani të pranojë ta rihapë Ngushticën e rëndësishme të Hormuzit.
Kjo është deklarata e tij e plotë:
“Bazuar në bisedat me Kryeministrin Shehbaz Sharif dhe Field Marshall Asim Munir të Pakistanit, dhe ku ata kërkuan që unë të ndaloj forcën shkatërruese që po dërgohet sonte drejt Iranit, dhe me kusht që Republika Islamike e Iranit të pranojë HAPJEN E PLOTË, TË MENJËHERSHME dhe TË SIGURT të Ngushticës së Hormuzit, unë bie dakord të pezulloj bombardimin dhe sulmin ndaj Iranit për një periudhë prej dy javësh.
Ky do të jetë një ARMËPUSHIM dypalësh! Arsyeja për ta bërë këtë është se ne tashmë kemi përmbushur dhe tejkaluar të gjitha objektivat ushtarake, dhe jemi shumë përpara me një marrëveshje përfundimtare në lidhje me PAQEN afatgjatë me Iranin, dhe PAQEN në Lindjen e Mesme. Ne kemi marrë një propozim me 10 pika nga Irani, dhe besojmë se është një bazë e zbatueshme mbi të cilën mund të negociohet.
Pothuajse të gjitha pikat e ndryshme të mosmarrëveshjeve të mëparshme janë rënë dakord midis Shteteve të Bashkuara dhe Iranit, por një periudhë dyjavore do të lejojë që Marrëveshja të përfundojë dhe të finalizohet. Në emër të Shteteve të Bashkuara të Amerikës, si President, dhe gjithashtu duke përfaqësuar vendet e Lindjes së Mesme, është një nder që ky problem afatgjatë të jetë pranë zgjidhjes. Faleminderit për vëmendjen tuaj ndaj kësaj çështjeje! President DONALD J. TRUMP”
