Këshilltari amerikan për sigurinë kombëtare takohet të martën me familjet e pengjeve të Hamasit

Këshilltari amerikan për sigurinë kombëtare, Jake Sullivan, do të takohet të martën në Shtëpinë e Bardhë me familjarët e pengjeve që po mbahen në Gaza nga Hamasi.

Disa familje të pengjeve janë në Washington DC këtë javë, ndërsa të tjerët mund të marrin pjesë në takim, tha administrata për CNN.

Takimi vjen pasi sekretari amerikan i shtetit, Antony Blinken, shprehu shpresën për një marrëveshje të re që mund të çojë në lirimin e pengjeve dhe një armëpushim në Gaza.

Korniza për një marrëveshje të tillë po i vihet udhëheqjes së Hamasit, tha kryeministri i Katarit, Sheikh Mohammed bin Abdulrahman Al Thani, më herët sot pas bisedimeve në Paris midis zyrtarëve nga SHBA-ja, Katari, Egjipti dhe Izraeli.