Universiteti i Prishtinës “Hasan Prishtina” ka dalë me një njoftim ku thuhet se do të hapet konkurs për zgjedhjen e rektorit të ri, të hënën, pas shkarkimit të rektorit Naser Sahiti nga Këshilli Drejtues.
“Konkursi do të hapet të hënën, me datë 24 tetor 2022, dhe shpresojmë të përfundojë me sukses sipas përcaktimit të saktë dhe të qartë të ligjit, Statutit në fuqi dhe parimit të meritës”, thuhet në njoftimin e UP-së.
Pas shkarkimit të Sahitit, Këshilli Drejtues i UP-së ka emëruar si ushtruese të detyrës së rektorit, Luljeta Plakolli-Kasumin, profesoreshë në Fakultetin Juridik të UP-së.
Në njoftim thuhet se Plakolli-Kasumi nuk pretendon të marrë pjesë në konkursin për rector, pas raportimeve në media se ajo është e afërt me Presidenten Osmani.
“Prof. Ass. Dr. Plakolli-Kasumi ka marrë përsipër këtë detyrë që të ndihmojë mbarëvajtjen e punës në Universitetin e Prishtinës “Hasan Prishtina” dhe të sigurojë ligjshmëri në konkurrencë gjatë procedurës së zgjedhjes së rektorit të UP-së. E njëjta, nuk pretendon të marrë pjesë në konkursin për rektor dhe pas përmbylljes së procesit do t’i kthehet angazhimeve të saj në Fakultetin Juridik”, thuhet më tej në njoftim.
Po ashtu, jepet edhe pak biografi e ushtrueses së detyrës së rektores, Luljeta Plakolli-Kasumi.
“Për informim të publikut, Prof. Ass. Dr. Plakolli-Kasumi, punon në Universitetin e Prishtinës “Hasan Prishtina” që nga viti 2008. Ka përfunduar studimet e larta postdiplomike në Universitetin e Pittsburgh-ut në Shtetet e Bashkuara të Amerikës, dhe ka një bagazh hulumtues dhe ekspertizë në fushën e të drejtës komerciale”.
