Menjëherë pas fillimit të agresionit rus në Ukrainë, Kosova mori hapin e parë drejt anëtarësimit në NATO.
Në mars të vitit të kaluar, kryeministri Albin Kurti formoi grupin punues për përshpejtimin e këtij procesi më në krye Ministrinë e Punëve të Jashtme.
Pjesë e këtij komisioni është edhe Ministria e Mbrojtjes.
Kjo e fundit në një përgjigje për Tëvë1, ka treguar veprimet që janë ndërmarrë në kuadër të këtij grupi.
“Në këtë aspekt është formuar grupi teknik profesional, i cili në bashkëpunim me zyrën ndërlidhëse të NATO-s është duke punuar për standardizimin e doktrinave, ndërkohë që po investojmë në ngritjen e kapaciteteve profesionale dhe operacionale të FSK-së, përmes shkollimit të kuadrove të reja të ushtarakëve në QSU, por dhe në akademitë më prestigjioze në botë, si dhe përmes modernizimit të pajisjeve ushtarake, investimit në armatime të prokuruara sipas standardeve të NATO-s, që vetëm gjatë vitit 2022 tejkalon për 84% shumën e investuar në këtë drejtim gjatë vitit 2021”, kanë thënë nga MB-ja.
Sipas këtij dikasteri, Forca e Sigurisë së Kosovës është e gatshme dhe ka kapacitete që të bëhet pjesë e Aleancës Veri-Atlantike.
E njohësi i fushës, Nuredin Ibishi vlerëson se në këtë grup duhet të ketë më shumë përfshirje nga shoqëria civile.
“Realisht duhet bërë një grup i punës, grup të them gjithëpërfshirës, jo vetëm nga strukturat institucionet por edhe nga shoqëria civile dhe nga ekspertët…”, tha ai.
Madje, ai tregon për tëvë1 hapat që duhet ndërmarrë vendi në këtë proces.
“Kështu që qëllimi përfundimtar është që Kosova sa më shpejt të kalon në Partneritetin për Paqe para anëtarësimit në NATO. Mandej duhet bërë programe strategjike. Mandej çështja e pjesëmarrjes në Kartën e Adriatikut dhe manovrat e ndryshme që janë organizuar- mbrojtësi i Evropës 21 dhe 22”, theksoi Ibishi.
Kurse, për Bedri Elezin, mostransparenca rreth punës së këtij grupi qëndron te kostoja financiare.
“Nëse i referohemi aktiviteteve të cilat janë marrë d.m.th nga ky ekip, komision kujtojmë se në aspektin financiar janë kogja të shtrenjta dhe ndoshta gjithë arsyeja pse janë mbyllur për publikun dhe mediat mund te jetë te çështja financiare, te shpenzimet e saj”, tha Elezi.
Madje, ai jep një afat se kur mund të jetë Kosova pjesë e NATO-s.
“Siç e dini janë disa kritere dhe procedura që duhet çdo shtet t’i zbatojë para se të bëhet anëtare e NATO-s, unë besoj që brenda një afati prej 5 vitesh Kosova do të jetë në NATO”, ka thënë Elezi.
Televizioni ka kontaktuar edhe Ministrinë e Punëve të Jashtme por që deri në momentin e raportimit nuk ka marrë përgjigje.
