Korporata Energjetike e Kosovës ka dalë me njoftim pas protestës së sotme të banorëve në Shipitullës lidhur me shpronësimin e tokave nga kjo ndërmarrje.
Sipas njoftimit thuhet se përvetësimi i tokës për nevoja xehetare nga KEK bëhet vetëm bazuar në Planin Kryesor Xehetar dhe në legjislacionin në fuqi, përfshirë Kornizën e Politikave të Zhvendosjes (KPZH), Ligjin për Shpronësimin e Pronës së Paluajtshme në Kosovë dhe Ligjin për Miniera dhe Minerale (LMM).
Sipas KEK-ut kjo çështje është përtej kompetencave dhe interesit të ndërmarrjes, raporton Ekonomia Online.
Tutje, për përvetësimin e tokave dhe zgjerimit të minierave për arsye të tjera, që nuk janë në përputhje me Planin Kryesor Xehetar, dhe planet tjera operative.
“Për më tepër, edhe sa i përket shqetësimeve (pretendimeve) të banorëve në lidhje me procesin e shpronësimeve, KEK për hire të transparencës të gjitha i ka adresuar tek organet relevante të drejtësisë. Prandaj, sa i përket përvetësimit të tokave dhe zgjerimit të minierave (për arsye të tjera), që nuk janë në përputhje me Planin Kryesor Xehetar, dhe planet tjera operative, përsëri ju bëjmë te ditur se kjo çështje është përtej kompetencave dhe interesit të KEK sh.a”, thuhet në reagim.
Dhjetëra banorë të fshatit Shipitullë të Obiliqit, kanë protestuar të martën para zyrës së Korporatës Energjetike të Kosovës lidhur me shpronësimet e tokave që i ka kryer KEK-u.
