Kanye West i ka kërkuar falje në hebraisht komunitetit hebre në mediat sociale për komentet e mëparshme antisemitike – duke thënë se “i vjen keq për çdo dhimbje” që mund të ketë shkaktuar.
Reperi 46-vjeçar, i cili ndryshoi emrin e tij në Ye në vitin 2021, bëri një sërë komentesh antisemitike vitin e kaluar që çuan në pezullimin e llogarisë së tij në Twitter (tani X).
Ai kishte shpërndarë një imazh të një svastika të ndërthurur me një Yll të Davidit në faqen e mediave sociale dhe akuzoi shokun e tij muzikant Sean “Diddy” Combs se kontrollohej nga “populli hebre”.
Dhe në një intervistë për Infowars, uebsajti i teorisë së konspiracionit të ekstremit të djathtë në pronësi të Alex Jones, Ye kishte lavdëruar Adolf Hitlerin.
Në faljen e postuar sot në platformën X dhe Instagram ai shkroi: “Unë sinqerisht i kërkoj falje komunitetit hebre për çdo shpërthim të paplanifikuar. Nuk ishte qëllimi im të lëndoja apo të mos respektoja, dhe më vjen shumë keq për çdo dhimbje që mund të kem shkaktuar”.
“Unë jam i përkushtuar të filloj nga vetja dhe të mësoj nga kjo përvojë në mënyrë që të siguroj ndjeshmëri dhe mirëkuptim më të madh në të ardhmen. Falja juaj është e rëndësishme për mua”, shkroi ai, duke shtuar se ishte i përkushtuar për të korrigjuar dhe për të avancuar unitetin.
Lidhja Anti-Defamation, një OJQ çifute që dokumenton antisemitizmin, i kishte përshkruar komentet e së kaluarës së muzikantit si nxitëse dhe konspirative. Tutje bënë të ditur se ai ishte referuar drejtpërdrejt në 59 incidente antisemitike të gjurmuara nga grupi gjatë vitit 2022.
