Përfaqësuesja e Lartë e Bashkimit Evropian, Kaja Kallas, gjatë një vizite në Mitrovicën e Veriut të premten, deklaroi se prania e aktorëve ndërkombëtarë në terren është thelbësore për të krijuar një pamje realiste të situatës dhe sfidave në rajon.
“Së pari, është e rëndësishme të jemi këtu në veri të Kosovës sepse shohim rrëfime të ndryshme. Është e rëndësishme të shohim se çfarë po ndodh në terren dhe çfarë thonë njerëzit”, tha Kallas, duke vënë në dukje se ajo vizitoi gjykatën dhe shkollat lokale, duke dashur të informohej nga afër për kushtet dhe funksionimin e institucioneve.
Ajo theksoi se gjykata aktualisht është duke funksionuar, por pritet kthimi i gjyqtarëve serbë.
Kallas shtoi se foli me komandantin e KFOR-it dhe përfaqësuesit e misionit të EULEX-it për të marrë një pikëpamje sa më objektive të situatës.
“Njëra palë thotë një gjë, pala tjetër thotë diçka tjetër. Megjithatë, forcat ndërkombëtare që janë këtu japin një pasqyrë të përshtatshme. Është gjithashtu e rëndësishme të bisedohet me banorët lokalë dhe të dëgjohen përvojat e tyre”, shtoi ajo.
Ajo arriti në përfundim se qëllimi i saj është që BE-ja, bazuar në informacionin e fituar, të punojë drejt një të ardhmeje në Kosovë që është “e begatë dhe e sigurt për të gjithë”.
