Së fundmi, më saktësisht në një intervistë për “Veçernji List”, Kurti përdori një metaforë ku përfshiheshin dy kafshë të egra: kali dhe dhelpra. Duke shpjeguar vërejtjen e tij për ndërkombëtare, Kurti theksoi se ata kanë vënë bast për kalin e gabuar në Serbi, duke iu referuar presidentit serb, Aleksandar Vuçiq.
“Brukseli dhe Uashingtoni kanë vënë bast për kalin e gabuar në Serbi, në presidentin e atjeshëm. Në fund doli që nuk ishte fare kalë, por dhelpër. Askush as nuk e ka imagjinuar që një vit e pesë muaj pas agresionit rus në Ukrainë, Serbia nuk do të vendosë sanksione ndaj Moskës, por madje do të lejonte që Sputniku të mbante bazën rajonale në Beograd. Në vend të reflektimit dhe introspeksionit të tyre, ata më godasin mua.” – tha ai.
Në fakt “bast në kalin e gabuar” është një metaforë e njohur në gjuhën angleze, që tregon për kalkulimin e gabuar gjatë ndonjë procesi. Në një paraqitje tjetër, kohë më parë, Kurti e kishte përdorur edhe një metaforë të çuditshme. Përderisa fliste për gazetën “Der Standard”, Kurti deklaronte se Kushtetuta e Kosovës nuk lejon formimin e Asociaconit duke u bazuar në kritere etnike.
Pyetja e radhës që iu shtrua ishte kjo: “Pra ju po përjashtoni një Asociacion me komunitet serb?”.
Pas kësaj pyetje, erdhi përgjigja interesante e Kurtit ku përmendi serb Vuçiq, të cilit iu përgjigj përmes metaforës tashmë të njohur “se s’mund të servosh kafe pa filxhan”.
“I kam thënë Vuçiqit që e kam përshtypjen se ai nuk dëshiron asociacion të komunave, sepse nuk mund të kërkosh asociacion dhe të thuash çdo javë: Nuk do ta njoh shtetin e Kosovës. Nuk mund të servosh një makiato pa një filxhan kafe.” – tha kryeministri i Kosovës.
Ndërsa gjatë një interviste për për “Der Bund”, Kurti ishte pyetur, mes tjerash, sërish edhe për Asociacionin e Komunave me shumicë serbe.
“Pse nuk impementoni marrëveshjet, si ajo për Asociacionin e komunave me shumicë serbe?” – kishte qenë pyetja që iu bë Kurtit.
Kurti kishte dhënë një deklaratë të ngjajshme, por duke e ndryshuar metaforën. Nga kafe pa filxhan, tash produkti i përmendur nga Kurti ishte “çaji”.
“Ai s’mund të thotë që Kosova është shtet i rremë dhe në të njëjtën kohë të kërkojë autonomi të komunave brenda këtij shteti. Është si të porositësh çaj pa filxhan. Ne nuk jemi budallenj.” – tha ai.
Kurti kishte zgjedhur të sqaronte qëndrimin e tij për korrigjimin e kufijve mes Kosovës e Serbisë, ide e mbështetur nga ish-presidenti i Kosovës, Hashim Thaçi, përmes një metafore të çuditshme. Në fakt, Kurti kishte tentuar të ilustronte mendimin e tij, duke theksuar se në Uashington, ku pritej të mbahej një takim, kishte “thika mbi harta”.
“Marrëveshja është e gatshme ku këta me thika mbi hartën e Kosovës kanë qëndruar për dy vjet e tash mua duan të më ftojnë t’i bashkohem tavolinës për kërcitjen e tapës së shampanjës, unë nuk e bëj këtë.“ – deklaronte Kurti vite më parë.
Por thikat mbi harta nuk u panë kurrë, pasi ideja për korrigjimin e kufijve mes Kosovës dhe Serbisë nuk u realizua kurrë. /Nacionale/
